Hnehna nena Stuttgart Open bul \an Raducanu

On Apr 19, 2024 10 0

Briton Emma Raducanu chuan a chetthat chhunzawmin world number one hlui Angelique Kerber lakah Nilaini zan khan darkar khat leh minute 26 chhungin 6-1 6-2 hnehna a chang hman a, Stuttgart Open second round lamah Linda Noskova of the Czech Republic a hmachhawn zui leh ang.
Nikuma tum hnih ngawt a banrek zai tawk Raducanu tan tun kha chawlhkar khat chhunga vawithum a chak tlinna ni tawhin, Billie Jean King Cup-ah match hnih chakin France lakah Britain a chakpui hlimhlawt a ni.
Stuttgart Open-ah khan hliam teivet avanga world number 303-na ni thla duai tawh Raducanu leh grand slam title pathum la tawh Kerber-te kha an ranking atangin main draw-ah an tel pha lo ve ve a, wildcard hmanga sawmluh an ni.
A fa hmasaber a hrin avangin kum 36 mi Kerber kha thla 18 zet a chawlh hnuah tun kha inelna hmachhawn tura khelmual a luh leh vawikhatna niin, a khelh danah a la zangkhai lo tih a hriat theih.
Nilaini inkhel dangah American world number three Coco Gauff pawhin a chipui American ve tho Sachia Vickery chu 6-3 4-6 7-5-in a hneh.
US Open champion lo ni ve tawh Gauff pawh hi kumin March thla Miami Open hnu lama tournament a khelh leh vawikhatna chiah a ni.
Two-time Wimbledon finalist Ons Jabeur pawh Russian Ekaterina Alexandrova lakah 2-6 6-3 7-6-in a chak ve bawk.
Tunisia chhuanvawr Jabeur hi WTA ranking-ah pakuana ni mekin, tun season kal laiah hian taksa lama harsatna neuh neuhin a tlakbuak chho ve reng a, kumin February ni 7 daih tawh Abu Dhabi tournament-a Raducanu a hneh hnu khan chak ni hmel a hmu lo chho ngar ngar a ni.
World number one hlui Naomi Osaka pawh Rouen khaw lama WTA 250 event-ah a clay-court comeback hmuh tur a awm a, mahse, Italy nula Martina Trevisan chuan Japanese kal zel tur hi 6-4 6-2-in a dangbet.
Kum 26-a upa Osaka hian hard court lamah major title pali sualchhuak ve tawh mah se 2022 French Open first-round a paltlang zawh loh hnu khan clay leilungah a inlan leh ta lo vang vang a; nau neih chawlh a hman zawh hnuin kuminah match 15 akhel tling tawh a, tah chuan vawiriat chiah a la chak.