Hnehna nuamsa nena Europe-a kirleh Juve

Hnehna nuamsa nena Europe-a kirleh Juve
Hremna an tawrh avanga pilbo Juventus chuan PSV Eindhoven laka 3-1 hnehna nuamsa changin an kawtkaiah Champions League bul an tan ve leh thei ta.
Thawhlehni zan Allianz Stadium inkhelah rawlthar kum 19 mi Kenan Yildiz chuan minute 21-na lekah Thiago Motta team hmahruaina goal khungin, Europe club competition lian berah Juve tana goal khung thei naupang ber ni reng thin club legend Alessandro del Piero record a khum zui ta nghe nghe.
Yildiz goal hmahruai thun atanga minute ruk an khelh tlin leh rualin Leeds midfielder hlui Weston McKennie chuan PSV goalkeeper Joel Drommel ven goal-ah sihnih faia mualneitu team hmahruaina goal a thawh ve leh. United States international McKennie hian nikum atang khan loan-in Juve tan hian a khel tan a, Thawhlehni zan thleng khan game 19 a khelhsak tling tawh.
Second half-ah pawh Serie A club bawk goal-a chefuh hmasa zawkah tang zui lehin, an thah atanga minute sarihna lekah Dusan Vlahovic chuan box chhunga tan khawh Nicolas Gonzalez tan mawihnai zetin ball a chhawpsak a, Argentine Gonzalez hian sithum faia Motta team hmahruaina leh Juve tana a goal hmasaber a tilut ve leh.
Hun pekbelh minute thumnaah Ismael Saibari chuan Johan Bakayoko ball pek tha zet hmangin Dutch Eredivisie champion PSV zangnadawmna goal a thun ve nawlh a, hun a tawp zui nghal.
Champions League khel regular thin Juventus hi club transfer lama buaina an tawh avangin an point paihsak a ni a, kha vang khan kum 2011-12 hnu lama a vawikhatna atan Europe elite club competition-ah hian an tel lo zet a, kum khat an pilbo hnuah kumin hian an rawn inlan leh a, an kawtkaiah hnehna nuamsa an lawm zui leh thei nghal a nih hi.
Season liamta khan UEFA Club Licensing leh Financial Fair Play rules bawhchhiaa puhna avangin European competition khel thei lo tura hrem an ni bawk a, club lam chuan an puhna hi an pha thung.
Turin khaw club chhuanvawr Juve hian Europe game an khelh leh turah Germany an lut dawn a; PSV hian Philips Stadion-ah Sporting Lisbon an mikhual thung ang.