Hockey award sem tuma lawmman dawng Mizo player pathumte

Hockey award sem tuma lawmman dawng Mizo player pathumte
Inrinni tlai khan New Delhi-ah Hockey India 7th Annual Award 2024 sem niin, he hunah hian India tana trophy latute zinga an tel avangin Mizo tleirawl pahnih leh India senior team player pawimawh ni phak Lalremsiamite’n an team-mate dangte rualin tangkafai an dawng.
2024 Women’s Hockey Junior Asia Cup champion team-a tel Mizo player pahnih Lalrinpuii Pachuau (Hnahthial) leh
Lal-thantluangi (Kanghmun)-te chuan Rs. 2,00,000 ve ve an dawng.
Asian Hockey Federation-in nikum December 7-15 chhunga Oman khawpui Muscat-a women’s international under-21 field hockey championship of Asia a buatsaihah khan Mizo tleirawp pahnih telna India junior team hi defending champion ni chungin an inlan a, an title kawl lai an humhim.
Final hun pangngaiah People’s Republic of China nen sikhat ve ve thuna an inhnehtawk hnuin penalty shoot-out hmanga chak zawk zawnnaah 3-2-in India an vannei a, India champion-puitu zinga tel Rinpuii leh Tluangi hian karliamta khan Hockey India hnen atangin cheng nuai hnih ve ve an dawng ta a ni.
Nikum November thla khan 2024 Women’s Asian Champions Trophy thlengtu leh champion lai ni bawk Indian hockey team chuan sikhat faia China hnehin a vawithumna atan he title hi an hlawhchhuak a; kha mi tuma India squad member-te khan Inrinnia Hockey India 7th Annual Award 2024 semnaah cheng nuai thum theuh dawngin, an zingah hian Kolasib nula Lalremsiami a tel.
Kawnpui leh Thenzawlah hockey khelmual pangngai (field hockey astroturf) kan nei ve der der tih loh chu Mizoram hmun dangah hockey khelmual tha Mizoramin a nei lo chungin Mizo tleirawl leh nulate’n national game hiala hockey hmanna ramah an theihna an pholang mawlh mawlh a, Aizawl khawpuiah ngei hian hockey khelmual tha kan mamawhna a sang hlein a lang a, India tana lang phak Mizo hmeichhe hockey player kan neih tawh leh neih mekte avang chauh pawh hian chu chu tihhlawhtlin theih ni se.
Mizoram hockey hruaitute leh an coach-te pawhin hei hi an aupui mek a; heti khawpa hmunhma kan nei chaurau chungin hockey ram ropui, hmeichhia leh mipa lama world ranking-a top 10 luah pha ve ve India rama kan tleirawl/nulate duai bik lohzia an hmuhin Mizoam khawpuiber tala international standard hockey ground neih hi phu ve tawhin an inngai a ni.
Tuna AR ram chhuahsan takah hian kan sawrkarin hockey ground han siam thei ngat se chuan women’s hockey-a Haryana rorelna hi kan Mizo tleirawlte hian an chhuhsak thei thuaiin a rinawm…