Hot 100 chart-ah Sabrina Carpenter-i’n Taylor Swift a lehthal thei ang em?

Tunkar Billboard Hot 100 (singles) chart-ah record siamin, top 14 a hauh fai vek a, karleh chart-ah pawh top 10-ah Taylor Swift hla hi la lang nual tura rin a ni a, mahse, No.1 hi a la hauh thei ang em? He dinhmun chuhbuai thei hnaivai ber tura an chhut chu Sabrina Carpenter a ni tlat mai.
Tunkar Billboard Hot 100 chart-ah Swift ‘Fortnight’ featuring Post Malone a No.1 chiang hle a, chart top 14 thlengin Swift hla vek a lang a, a album tar The Tortured Poets Department hlate an ni. Mahse, streaming leh sales-ah a kar hnihnaah chuan a tlahniam ve duai dawn a, chutiang karah chuan No.1 a la hauh thei dawn em, tih chu zawhna a ni ta.
Chart No.1 chuh phah tura an chhut chu Sabrina Carpenter hla hit ‘Espresso’ a ni a, he hla hi kar liamta khan chart No.7-ah a debut a, tunkar chart-ah chuan No.22-ah a tawlh ta daih a, mahse, tunkar chart-ah hian Taylor Swift hla ni loah chuan he chart-a rank sang parukna a ni pha tho.
Mahse, tunkarah ‘Espresso’ hi streaming-ah a rawn kang thar leh ta a, Spotify Daily Top Song USA chart-ah pawh ‘Fortnight’ lehthalin a rawn No.1 thai ta tlat mai a, Pop Airplay chart-ah pawh a rawn invawrh thar ve leh ta a, hei vang hian karleh Hot 100 chart-a No.1 atanga Taylor Swift nawr tawlh thei hnaivai ber niin an ngai ta a ni.
Sabrina Carpenter hi Taylor Swift nen intitha tak an ni a, Taylor Swift Eras Tour-ah hian Sabrina Carpenter hi opening act a neih sak nual a, hei hian rimawi khawvelah pawh a vawrh lar lehzual ta a ni.