Hot mix plant avanga harsatna thuneituten chinfel an tum lo – Dr Lalmalsawma

Hot mix plant avanga harsatna
thuneituten chinfel an tum lo
– Dr Lalmalsawma
Zuangtuia PWD hot mix plant tih chhiat chungchangah phalna nei lo an nih tih hrilhhriat fo an nih bakah khawtlangin harsatna an tawh chu hrilhhriat fo an ni chungin, thuneituten an bawhzui lo tih Congress treasurer Dr Lalmalsawma Nghaka chuan a sawi.
MPCC treasurer hian Thawhtanni khan Zuangtui Vengthara PWD hot mix plant halchhiat hi a hmunah a enfiah a. Kawng siamna atana pawimawh tihchhiat a ni chu pawi a tih thu a sawi rualin, lirthei takngial pawh pollution certificate neilote mana sumfai chawitir an nih laiin, boruak tichhe nasa thei dan kalha sawrkar berin a kalpui chu a dik lo tih a sawi.
PWD-in Mizoram Pollution Control Board atangin hot mix plant dah turin phalna an nei lo nia sawi a ni lehzel chu dan bawhchhiatna a awm em, tih sawrkarin endik turin an duh tih a sawi bawk.
‘Zuangtui khawtlangin an nawr chung leh MPCB-in tum hnih thupek a pe tawh chung a, PWD-in an zawm thei lo leh a hnulama insawifiah tuma nasa taka chet an la hi a zia lo takzet a. MPCB staff-te hi adviser to chief minister pakhatin na takin a vau tih thawm a thang lehzel a. He hot mix plant neitu M/s Sky Builder thlavang hauh ringawt loin, mipui harsatna tawh mek hi sutkian pui turin kan phut a ni,” Dr Lalmalsawma hian a ti.
Zuangtui Local Council pawhin vawi engemawzat sawrkar leh an bialtu MLA hnenah mipui harsatna an thlen tawh tih hriat a nih laiin, vawiin thlengin mipui harsatna tawh hi enpui leh ngaihsak a hlawh lo tih hriat a ni bawk tih a sawi a. A bialtu MLA, Environment Forest & Climate Change minister chu a bial mipui harsatna tawh hi chinfel sak turin an phut tih a sawi a ni.
‘Development hi a pawimawh a, heng hot mix plant pawh kawng siamthat zung zungna atan a pawimawh tih kan hria. Mah se, mipui tana ninawm leh pawi thei lo zawk, pollution titlem tura hmalakna awm thei se kan ti hle,’ MPCC treasurer hian a ti.