Mizoram PWD-in Zuangtuia Hot Mix Plant an bun chuan, meikhu nasa tak a tih chhuah thin avangin Zuangtui mipuite tan harsatna nasa tak a siam a. Hei vang hian PWD leh Zuangtui mipui inkar thu a fuh thei lo a. A tawi zawngin, tun hnai khan Hot Mix Plant hian Zuangtui mipui kut a tuar ta hial a. PWD lamin FIR an theh lut a, hei hian boruak dang a kangkai leh a, MNF party lamin thuchhuah siamin Zuangtui mipui thlavang an rawn hauh a.
He thilah hian, sawrkar lam thiltih dan hi a dik lo niin a lang. Boruak bawlhhlawh nasa tak siam thei hot mix plant, khawpui chhunga bun a ni hi a dik lo sa hrim hrim a. Khawpui chhunga lirthei veivakte meikhuchhuahin boruak a tihbawlhhlawh loh nan, lirthei atanga meikhu a chhuah dan a tha em, a dik em tih enfiah a, man chawia certificate hial pekchhuah thin a nih laia, helai Zuangtui (chu chu khawpui area) chhunga tlangkang (volcano) emaw tih mai tur khawpa nasa, chung lama meikhu par inchhuang let tup tup mai hmuh tur a awm hi a dik lo hle a ni.
Kum 15 vel kal ta khan, Export Promotion Industrial Park (EPIP) Lengte ram chhunga iron rod siamna hmunpui (Ispat) din tur, a hmun rawn endika lo kal, Central Pollution Control Board, North East bialtu Regional Director khan, Phunchawng thlang lawka kawng chhak lama lung herna khawl atanga rora her dip khu chu mihring tan a hlauhawmzia leh, chu lung herna khawl chu tihtawp a tul thu a sawi a. Tuirial bawlhhlawh paihna hmunpui kang atanga englai pawha meikhu chhuak reng mai a ngaihpawimawh thu pawh a sawi bawk a ni.
Tuna kan tarlan tak hmun pahnihte khi khawpui pawna awm ve ve an ni a, mahse, CPCB Regional Director khan, khawpui chhunga mihring chengte tana a pawi phak theih dan a sawi tlat a ni.
Tuna Zuangtuia Hot Mix Plant-in boruak chhia a siam hi, Zuangtui mipui tan chauh pawh ni lo, a chhehvel Aizawl khawpui chhung veng hrang hrangte tan pawh a pawi pha vek tihna a ni.
Chuvangin, sawrkar lam hian mipui tana pawi khawih nasa lo tur ang bera hot mix plant awmna hi a ruahman a ngai ta a nih hmel e.
Hot Mix Plant leh air pollution
Prev Post