‘Housefull 5’-in sum lak luh tamah ‘Sikandar’ lehpel

‘Housefull 5’-in sum lak luh tamah ‘Sikandar’ lehpel
Akshay Kumar channa, comedy series ‘Housefull’ film pangana ‘Housefull 5’ chuan Salman Khan channa ‘Sikandar’ film chu sum lak luh tamah lehpelin, kumina Hindi film sum la lut tam palina a ni ta.
Housefull 5 hi Zirtawpni kalta khan cinema hall-ah an chhuah tan a, opening day-ah cheng vaibelchhe 24 a la lut nghal a, Inrinni-ah cheng vaibelchhe 31 la lut lehin, Pathianni-ah cheng vaibelchhe 32.5 la lutin, Thawhtanni kalta khan cheng vaibelchhe 13 a la lut leh a, Thawhlehni kalta khan cheng vaibelchhe 10.75 a la lut leh bawk a, tihian ni nga chhungin India-ah cinema hall ticket hralhna atangin cheng vaibelchhe 111.25 a la lut nghal a ni.
Salman Khan channa, action film Sikandar hian beisei a pha lo a, an tlangzarh atanga ni 22 chhungin cinema hall ticket hralhna atangin cheng vaibelchhe 110.1 a la lut ve thung a, ni 22 chhunga a lak luh hi Housefull 5 hian ni nga chhung lekin a rawn khum nghal a ni.
Housefull 5 hi kumina Hindi tawng hmanna film zinga sum la lut tam pali a ni nghal a, Akshay Kumar tan a lawmawm dan a danglam khawp ang, ani hi tunhnaiah box office-a a che fuh leithei lo a, a channa Sky Force leh Kesari 2 ten beisei an phak loh hnuah Housefull 5 hmangin a rawn comeback leh ta a ni.
Housefull 5-ah hian Bollywood milar rual an inlan a, Akshay bakah Ritesh Deshmukh, Fardeen Khan, Abishek Bachchan, Sonam Bajwa, Jacqueline Fernandez, Nargiz Fakhri, Dino Morea, Chitrangada Singh leh Shreyas Talpade te pawh an inlan a, Taruyn Masukhani direct a ni.