HRINGNUN-A THUNEIHNA

Vanlalzawma
Muallungthu

Mihring mizia leh nunzia hriatchianna tha tak pakhat chu thuneihna an han neih a, thuneitu dinhmun an han chelh chiah hian hriatfiah a awl an ti fo a. Chu thuneihna chu a hniam emaw a sâng emaw, amah; thuneitu mihring mizia phak tâwk atanga tehin, amah aia dinhmun hnuaihnung zawka awmte chunga a khawsak duh danah a langchhuak chiang viau thin a ni awm e.
Thuneitu dinhmuna ding, thuneihna hman dan thiamlote aimaha thil huatthlala leh ngaimawhawm, thil pawi tak thlen thei ni ve bawk si chu thuneitute laka tlaktlum duhna avanga hotute tlawna, an laka tlaktlum duhna avanga a-rûk a-râla mahni thawhpuite kher ching, chunglêng leh hnuaileng indo thawnthua Bäk ang maia chet ching ho hi an ni fo mai. Heti ang mi hian khawi-i hmunah pawh thawhhona an ti chhia a. A rûka innghirnghona chawk chhuakin; thawhpuite nena inlungrualna an hnawt tiau thin.
Chuti ang mite chuan anmahni tanghma chiah an ngaihtuah a. Thawhhona kârah boruak chhia an siam a. Lungrûal taka thawhhona nun an tichhe thin. Chu boruak chu hotu; thuneihna humtu kha mifing var vâk lote an lo nih phei chuan an thliar thiam lo a, chuti ang mite bäwl-phawn theih chuan an awm thin. Chuvang chuan, thuneitu chuan an thuneihna an hman khawloh phah thei a. An thuneihna hmangsualin duhsak zawng leh duhsak loh zawng an neih phah a. Chu chuan thuneitu ni si, rorêl thiam lo takah hotu chu a siam ta thin a ni.
Chuvang chuan; thuneitu, hotu chan chang chuan a dëra amah betlawntute avangin rorêl a thiam loh phah fo ta thin a. Mifel tak takte felna pawh a hmu thei lo fo a, a mit chu tihdelin a awm tlat tawh thin. A bula chetlâ, amah tlawntute fakdêrna chiah kha a thu hriat tam anih avângin a khawhawi a zîm lo thei ta lo thin a. Chuti ang mite thu leh hla chu a pawm a, a awih thin avâng chuan a mit a meng zau tawk thei ta lo a. A khaw-hmuh a tawi a, thil thlir dan a thiam ta lo thin a ni. Chuvâng chuan, mi tha leh dikte pawh mi tha lo leh dik lo angin a hmu ta tlat zawk thin a, a mit leh beng a vâr zo tawk ta lo thin a ni. Thuneihna leh hotu dinhmun luahtu ber anih si avangin leh a hmalâkna kawng tinrengah, a mawhphurtu ber anih miau avangin a hnunglamah mi huat leh dem te, rorêl thiam lo thuneihna chelh si, a rûka mi nuihzat anih phah thei thin.
Hmaichhana amah fak a, tlawn a, ngaisang awm taka a dëra amah be tlawntute thu chu a zâwm a. Hotu a nihna angin thil reng reng lâi takin a thlir thiam tawh thin si lo a. Hotu a nihna anga rorel pawh a thiam tak si loh avângin a mualpho phah ta thin a ni. A bula khawsa, amah be tlawntute thu a awih tam poh leh a mualpho tam mai a. |awng loh tura ngaihah a tawng tam a. Mi pawi a sawi tam a. A tlawntute chu mi tlem zawk an nih thin bawk si avângin amah hawtu pawh an tam phah ta zawk thin a ni.
Chuti ang mi chuan a duh ber chu a thuneihna nasa lehzuala chelek a, midangte hnuaihnung taka thunun a ni a. A aia hnuaihnung zawk te chungah nasa lehzual zawka thuneihna chelek kha nuam a tiin a duh dan a ni thin. A duh dan anga thil a kal lohin lungawina a hmu lo a. Thawh ho dan thiam lo anih phah ta thin a ni. Mifing var vâk lo a nih phei chuan a bula miten an duh ang angin an bâwl kual a, mualphona erawh ama chanpual a ni thin si. Chu chu a hrethiam pha thin lo a. Hotu mawl, rorêl thiam lo, thil chinchang hre bawk si lo dinhmunah a ding ta mai thin a ni.
A thuneihna a hriat lutuk luatah a hnuaia mite chungah a inluling fo a. Chuvang chuan, a rukin amah hawtu a ngah a. A thuneihna chelek nasat a tum luatah a hring-nun-phung a hniam phah fo bawk. A inlulin nasat apiangin harsatna a hmachhawn tam a. Fak hlawh nih a duh leh tho thin si avangin a che phelh a, miin an dem a, amah bâwl kualtute hming lang tawh loin amah chiahin mi huatna leh demna a hlawh ta thin a. A hnunglamah miin an nuihzat duh fo.
Hei hi hringnun-a thuneihna, hotu nihnain a ken tel ‘ze’ chikhat a ni a. Kan sawi bakah pawh hian he hringnun hian ken tel chi hrang hrang a nei ang. Tawp chin lêm nei loa sawi tur a tam viau thei ang. Engpawh chu ni se, hei hi hringnun-a ze pakhat, mi tam tak zinga mi thenkhatten kan nunpui thin chu a ni si a le! He hringnun teh rêng hi chu aw!