Hriselna atana insen

Health minister chuan mipui zawng zawng huap tur ‘Mizoram Universal Health Coverage Scheme’ chu sawrkarin a duang mek tih a sawi a. Damloten anmahni sum seng loa damdawi ina an inenkawl theihna tur, cashless system-a kalpui a ni ang a, hemi atan hian uluk takin sum hmuhna tur, sum hman dan tur, bill theih chin leh, rate bithliah tur hrang hrang zirchian mek a ni, tiin a sawi bawk.
Sawrkarin a ngaihpawimawh hmasak zinga ‘mipui hriselna’ a awm hi a lawmawm hle. Hriselna hi engkim a ni, tiin sawi ila, a dik ber mai awm e. Hrisel loh chuan hma a sawn theih loh mai ni lovin, a hlim theih loh. Hmasawnna awm mah se, hriselna a tel loh chuan a kim lo.
Mizoram mipui hi a tlangpuiin kan hriselna a pan ru hle niin a lang. Kan khawsak phung (lifestyle) inenfiah ngai tak pakhat chu kan ei leh in te hi a ni. Cancer natna vei tamna ram kan ni te pawh hi, kan ei leh in fimkhur loh vangah puh a nuam ber awm e. Daktawr ten an sawi thin chu, Mizo mipuite hi zaa sawmkua aia tam hi pumpui natna nei kan ni, an ti thin. Kan ei leh kan in, kan thil chin thin (zuk leh hmuam, zu leh ruihhlo etc) avanga sum kan sen nasat thinzia hi, kan hre vek a, hmasawnna thuanawp phahna a tling. Hrisel lohna avanga inenkawlna atana sum senso hi Mizoram hmasawnna daltu lian tak pakhat a tling, a tih theih awm e.
Sawrkar hnathawk, damlohna avanga inenkawlna atana sawrkarin kum tin a sen ral thin hi vaibelchhe tam tak a ni a; hmasawnna kawng daltu lian tak a tling pha. Hei hi hriselna atana insenso hmasak kan tum loh vang a ni pakhat awm e.
A mipui mimir hrim hrim pawh hian, hriselna kan dah pawimawh loh avangin, kan thawhchhuahsa sum leh pai tam tak inenkawlnan kan hmang thin a, hma kan sawn thei lo. Kan hriselna atan hian insengso thiam ila chuan, tuna damlohna avanga kan senso zaa 80 vel hi chu kan hum thei ang a, chu chu changkan awkna tham a ni.
Hriselna pawimawhzia hi a zau thei ang bera mipui hrilhhriatna (awareness campaign) kalpui theih a sawt hlein a rinawm.