Huaisen lawmman hlan

Lawngtlai AOC Veng ami R Khawlliana (88) s/o Dartlinga (L) chuan India rama civil miten huaisen chawimawina an dawn thin zing ami Jeevan Raksha Padak Award a dawng a. Thawhtanni khan Lawngtlai district bawrhsap H Lalhmingthanga chuan a kutah a hlanchhawng.
2021 October 27 khan R Khawlliana hian an in kawmchhaka Power & Electricity department-in transformer an dah siamthat tuma hna thawk mek AOC Veng mi H Lalrinchhana chu electric current-in a man a, R Khawlliana hian mautlawn hmangin a chhanchhuak a ni.
Bawrhsap chuan mi ropuite chawimawina hun hman a ni chu lawmawm a tih thu sawiin, an district chhunga India rama civil mi huaisen chawimawina sang dawng thei a awm chu ropui a tih thu a sawi.
Chawimawina dawngtu R Khawlliana hi stroke vanga enkawl mek niin, chawimawina hi a fanu R Vanlaldiki’n a dawnsak a. Award-in a kentel sumfai chu kumin August 21 khan cheque-a hlan a ni tawh a; tun tumah hian a kentel dang – medal leh citation hlan a ni.
Jeevan Raksha Padak Award hi hun leh hmun harsa tak kara mahni nunna thapa midang nunna chhantute hnena a hlan thin a ni a. Award hian medal, citation leh cheng nuai khat a keng a ni.