Hun ralmuangah pawh Pathianin MNF a thlauhthlak bik ring lo
Hun harsaa rorel tura Pathianin a ruat MNF chu hun ralmuangah pawh a thlauhthlak chuan a ring lo tih MNF vice president Lalthlengliana chuan a sawi.
Zirtawpnia Keifang MNF Group Committee huaihawt intuaitharna a hmanpuinaah Lalthlengliana chuan MNF chu an chhiat chang awm mah se, Lalpa’n a hruaichhuak leh zel tih a sawi. Hun harsa leh hun khirha Mizote leh Zoram kaihruai turin Pu Zoramthanga kaihhruai sawrkar chu Pathianin a ruat tih sawiin, “Hrileng leh buaina hrang hrang kan hmachhawn hi party dang kaihhruai laia thleng chu nise, kan tawrh dan tur hi a rapthlap zual ang. Pathian zarah hun ralmuang kan thleng chho mek a. Hun harsaa rorel tura Pathianin a ruat hi hun ralmuangah a thlauhthla lo ang. Congress leh ZPM hi Pathianin a sawrkar tir thut ngai loang,” a ti.
Tunhnaiah Myanmar, Bangladesh leh Manipur buaina avangin kan chipuite an lolut a, heng boruak hian rorelna pakhat hnuaia Zofate kan awm hun a hnukhnaia a hriat thu MNF vice president hian a sawi. “MNF chu kan thil tumah inchi khat pawhin kan la tawlh loa, kan duh ber chu independence a la ni reng,” a ti.
ZPM leader Pu Lalduhoma chu a vanglai chuan pa viak tha leh fel tak, hotute thuawih thei tak, politics-a luhchilh atang chuan engmah a ti fuh thei lo niin a sawi. Political party hrang hrang 10 dawna awm tawh, ama din party pawh chhuahsan a, tlin duh luat vanga a chhuahsan party pawh inthlan dawna thawhpui fo tawh leh tlakpui zel thin a ni, tih te a sawi. “A hnung zuitu tam tak beidawngin an thamral zel a, a kawng zawh loh tur a zawh ni berin ka ngai. A tute rual lek lekin cabinet minister-ah an luhsan zung zung a, tunlai technology sang zel a man pha ve si loa, a chesual phengphung a, Congress-ah khan thuawih tak leh rinawm takin awm reng se chuan, a chief minister ve tawh maithei,” a ti. Serchhip by-election a a campaign laia a intiamna pakhat pawh a tihhlawhtlin lo niin a sawi bawk.
Congress president Pu Lalsawta pawh MNF-a an MLA ni reng tawh a ni tih Lalthlengliana hian sawiin, “Kan party a a awm lai pawhin a zawi ngiai ngiai kan tih thin kha a ni a; a kaihhruaina hnuaiah Congress an sawrkar ka ring lo,” a ti