I ha i floss thin em?

I ha i floss thin em?
Nitin ha vawi hnih nawh tur tih te hi kan inzirtir nasa tawh a, zawm tha tak tak pawh kan awm. Mahse, nikhatah ha vawi hnih nawh ringawt hi a tawk lo, mithiamte chuan nitin tum hnih ha floss tel a ngai niin an sawi. Hei erawh kan ti ngai vak hlawm lo ang, mahse ka chhung hriselna atana pawimawh tak a ni si. Flossing chu thildanglam tehchiam a ni lo va, lazai ang deuha ha kar tihfai a ni mai, hemi atana hman tur chi dental floss te pawh lei tur a awm e.
Kan ha hian kan thil ei te a lo thial sawm a, kan thil ei nawi tlem tlem hi ha karah te a tang thin a, chu chuan ha a tinget a, hahni natna chi hrang hrang te pawh a thlen thei. Hetah hian flossing hi a pawimawh ta a ni. Ha kan nawh ringawt hian ha kar zawng zawng a tifai thei lo a, ha nawh a fai lo kha, flossing-a tihfai a ngai ta a ni. Ha karah kan thil ei ban deuh leh mawm deuh te tihfai loha a tan reng chuan ha leh hahni a tichhe thei thin a ni.
Kan thil ei bangnawi ha kara tang leh kan chil in chawhpawlh hian bacteria a siam a, chu chu kan ha kar velah te an awm thin. A lo rei hnuah chuan ha nget bakah gingivitis te pawh a thlen thei a, ha te pawh a chhiat phah thei. Flossing hian kan ha kara bal hlawm tang, ha nawh a fai mai thei lo te chu a tifai thei thin a ni.
Ha kan floss ngai loh chuan, ni khata ha vawi khat tal floss thin te aiin chronic gingivitis leh ha nget risk a sang zawk a, heng ha nget te hi enkawl that a nih loh chuan root canal treatment te pawh a ngai thei a, ha phawi te pawh a ngai hial thei. Heng bakah hian ha floss ngai loh chuan ka chhung rimchhia te pawh a awm duh bik a ni.
Nitin i ha vawi hnih i nawh bakah, zing leh tlaiah floss thin la, ha kar zawng zawng floss vek thin ang che. I ha i nawh lai emaw i floss lai emawin a thi thin a nih chuan doctor i rawn dawn nia.