I Kawtkaiah Sawrkar

Mipuite’n sawrkar hmalakna hrang hrang an chhawr tangkai theih nana an khuaa kal chilha service hrang hrang chhawp chhuahsakna, “I Kawtkaiah Sawrkar” (Prashasan Gaon Ki Ore) chu nimin khan Lunglei DC kaihhruaiin Bunghmun khua leh a chhehvel mipuite tan Bunghmun BDO Complex-ah buatsaih a ni a.
He hunah hian electoral roll enfiah/inziah luh, Aadhaar siam, income & tribal certificate dil, ration card siam that, bank account hawn thar, hriselna dinhmun endik & ABHA Card siam, ran entir leh ui â hri (anti rabies vaccine) pek, thei leh thlai chi sem, sawrkar scheme hrang hrang inhrilhfiah leh inziah luh leh mipuiin harsatna an thlenna hun te buatsaih a ni. Tun May thla chhung hian Bunghmun, Tlabung, Lungsen leh Bualte-ah te buatsaih chhunzawm tur a ni bawk a.
He programme hi India sawrkarin nikum October atanga a kalpui tan kha a ni a, Mizoramah pawh kumin January ni 14 atang khan kalpui tan a ni a. Hetianga hmun kilkhawr zawk amite mamawh phuhrukna tura kalchilh hi thil tha tak leh lawmawm tak a ni.
Mizoram hian kawng hrang hrangin hmasawnna kan nei chho vel zel a. Rambuai avanga kha leh chen hmasawnna hna thawk thei lova kan awm hnuah, state dangte hnunga awmin kan kal ve fat fat a. State dang lo insawhnghet tawhte dinhmun ang chu pha rih lo mah ila, hmasawnna kal chak dan tehnaah state dang tam tak kan hmakhalh thei thin a. Good Governance Index 2021-ah pawh khan Sector pahnih- Agriculture and Allied Sector leh Public Health-ah khan North East leh Hill States zingah a ti tha ber kan ni a. Hei bakah hian commerce and industry leh human resource development lamah hma la tha pawl kan ni pha bawk.
Hei hi state dangte aiin kan ropuiin kan changtlung tawh zawk e tihna ni lovin, heng sector-ah te hian a tehkhawng (criteria) dungzuiin kan ti tha e tihna te pawh a ni thei awm e.
Eng pawh ni se, state rethei tak, ei leh bar leh thildangah intodelhna la nei lo mah ni ila, hma kan sawn zel hi a lawmawm hrim hrim a. Chutih rualin, kum khat chhunga state sum hman tur ruahmannaa mipui sum za zela 80 deuhthaw hmangtu sawrkar hnathawkte hian, mipuite hi an duat thiam erawh a pawimawh a, mipuite hian kawtkaia kal chilh hi chu an phu ve viau a ni.