I League a zo, champion an la awm lo

Indian I League 2024-25 chu Pathianni zan khan khelh zawh a ni a. League khelh zawh a nih hnuin champion leh tlahniam tur a la chiang lo thung a, champion tur leh tlahniam tur rel that leh rih a la ngai.
Champion lai lawk Churchill Brothers
Pathianni zan khan champion thei dinhmuna ding pahnih; Churchill Brothers leh Inter Kashi ten inkhel an hmachhawn. Churchill Brothers an chak zawh loh laia Inter Kashi an chak si vangin I League champion tur a la chiang thei lo. I League 2024-25 khelh zawh thlenga point hmu sang ber chu Churchill Brothers an ni a. Point thum hmuh belh thei dinhmuna ding an nih vangin Inter Kashi hi champion thut thei an la ni tlat bawk.
Pathianni zan hian hmahruaitu Churchill Brothers chuan Real Kashmir an hmachhawn a, 1-1 in an inhnehtawk. Real Kashmir tan minute 8-na leka Ramsanga Tlaichhun goal thun chu Churchill Brothers tan Rafiq Aminu chuan minute 50-naah a sut. Hun tawp thlengin goal dang a luh belh thei lova, Churchill Brothers in point khat an hmu a, table chung ber luah chhunzawmin, champion lai lawk an ni rih.
Churchill Brothers an chak zawh loh lai hian champion thei dinhmuna ding ve tho Inter Kashi chuan an khingpui Rajasthan FC chu vanneihthlak takin an hneh ve thung. Inter Kashi tan hian minute 12-na lekah Prasanth Karuthadathkuni chuan hmahruaina goal a thun nghal. Hma takah goal thun mah se Rajasthan FC tan hian Alain Oyarzun chuan minute 69-naah goal thunin an si phurh a sut. 1-1 a nih hnuin goal dang a luh belh thei lo reng a, Inter Kashi in champion an beiseina a chuai hman. Hun pangngaiah chak thei lo mah se Inter Kashi hian hun pek belah goal hnih an thun ta tlat thung. Minute 90+3-ah David Bollo chuan hma an hruai nawn lehna goal a thun a. Minute 90+7-ah Matija Babovic chuan an goal thumna a thun zui leh zat a, an mualah ngei hnehna changin point thum hlu zet an hmu. Rajasthan FC laka point thum an hmuh hmangin Inter Kashi hi champion thei dinhmunah an ding thar leh.
Churchill Brothers la champion loh chhan
League an khel zo tawh a, team 12 ten khelh 22 theuh an khelh atanga point 40 hmu a, point hmu sang ber chu Churchill Brothers an ni a. Table chung ber luah chunga season hmang zo ni mah se Churchill Brothers hi I League champion an la ni bik tlat lo thung. Hei hi a chhan chu Inter Kashi hian point 3 hmuh tir leh tura complaint an neih vang a ni.
Inter Kashi hi January 24, 2025 khan Gokulam FC lakah 6-2 ngawtin an tlawm. Gokulam laka an tlawm tum hian yellow card vawi li hmuh tawh vanga hrem tuar, inkhel hmachhawn thei lo tur pakhat chu an khingpuite hian an chhawr niin an hria a, complaint an thehlut. Player chhawr theih loh chhawr an awm a, hriat chhuah an nih chuan chu team chu chak lo zawka puan theihna dan a lo awm si a. Chu dan hmang chuan Inter Kashi hian AIFF hnenah complaint an thehlut ta a, chu an complaint chungchangah chuan thutlukna siam a la ni lo. Thutlukna siam a nih a, Inter Kashi hian hnehna an chang a nih chuan Inter Kashi hian point thum an hmuh belh ang a, an chunga awm Churchill Brothers chu point 2 in an lehpel ang a, I League champion niin ISL-ah an kaisang ang. Hei hi I League 2024-25 khelh zawh a nih thlenga champion tur zawk la chian theih loh chhan chu a ni.
Table-a sang ber ni mek Churchill Brothers chuan League champion tur chu court-ah ni lovin, mualchhunga chinfel tur a nih thu an tarlang a. I Legue champion an nih thu an puangzar bawk. Hetihlai hian Iner Kashi pawhin champion turin an thawkrim a, an thawhrim chhunzawm zel tur thu an sawi ve thung a. Heta an sawi awmzia hi complaint an theh luhah hlawhtlin ngei tuma an beih zui tur thu a sawina a ni.
Aizawl FC pawh
Pathianni zana khelh zawh tak I League 2024-25-ah khan Aizawl FC pawhin an chak lohna match complaint an neih vangin point thum an lo hmu ve tawh bawk.
Aizawl FC leh Churchill Brothers an inhmachhawn tumin Churchill Brothers in dan an bawhchhia a, foreigner player an chhawr theih aia tam an chhawr. I League-ah hian match khatah foreign player pali bak chhawr theih a ni lo. Aizawl FC lakah hian Churchill Brothers in foreign player pali an luhtir a, pakhatin red card a hmu. Red card hmu an awm hian foreign chanvo pakhat a chhuah telpui a ngai. Mualchhungah foreign player pathum bak an awm thei tawh lo tihna a ni. Chu chu hrechiang lovin Churchill Brothers hian bench atangin foreign player bawk an luhtir leh. An khingpuite dan bawhchhiat hi Aizawl FC in an hre chiang si a, dan tlawhchhanin an zual kova, hlawhtlingin point thum an hmu. He point thum an hmuh hi an him pui rih ta chiah bawk.
Complaint an theh luhah Inter Kashi an hlawhtling a, an champion zui a nih chuan Churchill Brothers hian Aizawl FC laka point thum an hloh hi an la ui vawng vawng ngei dawn. A rei telh telh ang a, an ui zual deuh deuh hial ngei ang.
Aizawl FC an tlahniam ang em?
League khelh zawh a nih thlengin champion tur a chiang lova, tlahniam tur a chiang lo bawk. Aizawl FC ngei pawh an him rih a, an him lo leh thut mai thei bawk.
Tun dinhmunah chuan Aizawl FC hian khelh 22 atangin 23 an hmu a, 10-naah awmin an him chiah chiah. An hnuai chiaha awm SC Bengaluru aiin point hnihin an sang zawk rih. Mah se, SC Bengaluru hian point thum hmuh belh tumin complaint an thehlut a, thutlukna an nghak mek. An complaint-ah an hlawhtling a nih chuan SC Bengaluru hian point 24 an hmu ang a, point 1 in Aizawl FC an lehpel chiah chiah ang. I League atanga team hnih tlakhniam ngei ngei a ngai a nih chuan Aizawl FC an tlahniam thei dawn.
SC Bengaluru in complaint an neih hi Inter Kashi in complaint an neih ang tho; yellow card hmuh hnem vanga chhawr theih loh tur player chhawr tang tho a ni. Namdhari nen an inkhelh tuma thil thleng a ni. Inter Kashi leh SC Bengaluru complaint chungchangah thutlukna siam a la ni loh vangin I League-ah champion tur leh tlahniam tur a la chian theih loh phah ta a ni.
I League an khelh hmasak berah Aizawl FC hi dan leh dun duan lawk ang chuan tlahniam tur an ni a, mah se an tlahniam ta lo. I League-ah hian team awm zat tur bituk fel tak a awm sa lem lo va, SC Bengalru hi an lo him ta a nih pawhin Aizawl FC pawh hi him tho bawkin, I League-ah team an tam phah hret ve thei tho bawk. Hei hi India, Hamara Desh a ni tlat.