ICFAI Mizoram-in convocation hmang
ICFAI University Mizoram chuan Convocation vawi 11-na an campus Durtlangah Ningani khan an nei a. Zirlai 267 (under graduate & post graduate) ten degree an nei thar. DRDO chairman leh Ministry of Defence (R&D) secretary hlui, Aeronautical Society of India president Dr G Satheesh Reddy chu khuallian a ni a. Padma Shree K C Runremsangi chu khualzahawm a ni.
Convocation kaihruaitu Visitor of ICFAI, larsap Dr Hari Babu Kambhampati chuan zirlai hlawhtlingte chu hmalam hun eng tak leh chona liantham zawkin an hmuak tih a sawi a. Nasa lehzuala tan la tur leh ram leh hnam tana thawhhlawk, khua leh tui tha ni turin a fuih. ICFAI Mizoram chu a hmasawnnaah a lawmpui tih sawiin, NEP 2020 ruahmanna siam anga chak taka kal turin a chah a. Skill development, entrepreneurship, reasearch leh vocational education lama thapui thawh turin a fuih a ni.
Khuallian Dr G Satheesh Reddy chuan khawvelah India mithiamten science leh technology ah an thawhhlawk a. Tunhmain India rama zirlai thiam filawr tak takte USA, Europe leh ram hausa zawkah hna zawngin an chhuak thin a, tunah erawh a inthlak hlawk a, kalchhuak hmasa zawkte pawh India ramah lokir lehin Start Up India hnuaiah awlsam takin bul an tan a, hun reilote chhungin cheng vaibelchhe tam tak hu company an ni tawh tih a sawi.
“Make In India hnuaiah rampawn atanga kan lei leh lakluh thin hmanrua, bungrua leh technology siamin hmasawnna an thlen mek a. Mizoram thalaite pawhin Start Up India leh Make in India hnuaiah hian Mizoramin hlawhtlin theihna a neihte dap chhuakin hlawhtlinna an chan theih ka ring a ni,” a ti.
ICFAI chancellor Prof YR Haragopal Reddy chuan convocation hi a hawng a. Vice chancellor Prof Bijay Singh chuan inlawmna thuchah sawiin, University report a pe nghal a ni.
Convocation-ah hian ICFAI Mizoram chuan sawrkar atanga honorary doctorate degree pek phalna an hmuh thu chancellor hian a puang a. He degree hi mipui rawngbawlna huang, zirna leh thil dangah chawimawi phute hnenah pek thin a ni ang tih a sawi. A vawikhatna atan, he chawimawina hi Mizo Folk Song & Dance huanga hna thawk tha, Padma Shree Award 2022-2023 dawngtu KC Runremsangi hnenah ICFAI University Mizoram hian a hlan tih a puang a. DLitt (Honoris Causa) hi KC Runremsangi hnenah ICFAI University Mizoram aiawhin visitor Dr Hari Babu Kambhampati leh khuallian Dr G Satheesh Reddy ten an hlan a ni.
11th Convocation of ICFAI University Mizoramah hian graduate tharte hi vice chancellor Prof Bijay Singh hnen atangin degree certificate an dawng a. Dr G Satheesh Reddy chuan zirlai titha zual zinga silver medalist-te hnenah chawimawina thuziak leh medal a hlan a. Visitor Dr Hari Babu Kambhampati hnen atangin gold medalist-ten chawimawina thuziak leh medal an dawng a ni.
Tunah hian ICFAI University Mizoramah zirlai 601 an awm a. Course hrang hrang – MBA, M.Com, MA, MSW, MSc (Geog), BBA, BCA, H&T, BA leh B.Com. te a kalpui mek a ni.