Idris Elba’n a hming bulah ‘Sir’ tih a dah thei ta

Kum thara sap lal chawimawina an hlan thar zingah actor Idris Elba, zaithiam Ellie Goulding leh Cyntia Enrivo te pawh an tel. Sap lal chawimawina an hlan hi CBE (Commander), OBE (Officer) leh MBE (Member) te niin, CBE hi chawimawina sang ber a ni a, a dawngtute chuan an hming bulah ‘Sir’ (hmeichhiain Dame) tih an dah thei a ni. Kumina heng chawimawina chi hrang hrang dawng tur an puan hi politics, sport, entertainment, science leh leh thil dang atanga dawng tur mi 1,157 an awm.
Idris Elba hian CBE, Commander of the Order of the British Empire dawngin, Sir Idris Elba tih a ni ta. Elba hian he chawimawina hi thalai te zinga a charity avangin a dawng a, anti-knife campaign neiin, a nupui Sabrina nen Elba Hope Foundation an din a, UK leh US bakah Africa-ah te he foundation hian hlawkna um lovin vantlang tan hna an thawk thin a ni.
Elba hian a tleirawl laiin National Youth Music Theatre program-a a tel theih nan Prince’s dawngin, pound 1,500 a dawng a, heta tang hian lemchan lamah zuang lutin, TV show lar tak tak The Wire leh Luther-ah te a inlan a, DJ Big Driis tih hmingin rimawi lamah pawh hming a chher ve viau bawk.
Zaithiam leh lemchanthiam Cynthia Enrivo leh zaithiam Ellie Goulding te pawhin MBE, Member of the Order of the British Empire an dawng a, Enrivo hi drama leh art lama a thawh that avanga chawimawina hlan a ni a, Goulding hi music lam ni loin, khawvel sik leh sa danglam chak lutuk venna tur lama a thawh hlawk avanga hlan a ni thung. Goulding hi UN tan global environmental ambassador a ni.