ILP pek chhuah dan chhiarkawp…

Tun hnaia Vairengte ILP check post-a thil thleng chungchanga MZP thuchhuahin a tarlan danin, tun thla August kan hman mekah hian ni 18 thlenga ILP pek chhuah zat chu 2,573 a ni a. Hei hi chawhrualin ni tin mi 142 hnenah ILP pekchhuah ang a ni. Hetiang rate anga chhut chuan, August thla chhungin mi 4402 hnenah ILP pekchhuah a ni dawn tihna tluk a ni.
Ngaihruatna hmanga chhutna (hypothetical) han ruai leh lawk ila: Kum khatah ni 365 a awm a, ni tin ILP pekchhuah zat hi 140 ni ta se, kum khat chhunga ILP pek chhuah zat chu 51,100 (365×140=51,100) a ni ang a; kum 10 chhunga ILP pekchhuah zat chu 5,11,000 (51100X10=5,11,000) tihna a lo ni dawn ta a. Hetih lai hian, vawihnih khat ILP renew hnua haw leh ta hi an awm ve deuh reng dawn a, chuvangin kum 10 chhunga Mizorama awm regular tur hnamdang ILP nei hi mi Nuai 5 velah a dah theih awm e.
Hei hi tun August thlaa ILP pekchhuah dan rate atanga chhut chhinna mai a ni a, chu chu kan hma lam hun kum 10 lo awm tur thil a ni bawk. Tuna Mizorama ILP nei sa awm mekte chhiar tel miah lo hian, tuna ILP kan pekchhuah dan Rate (August) anga kan pekchhuah reng bawk si chuan, kum 10 lo awm leh tur chhung hian hnamdang ILP nei mi nuai nga Mizoramah an awm belh dawn tihna a ni.
Chhiarpui hnuhnung pahnih atanga chhutin, Mizoramah mihring kan pung chak lo hle a. Kum 2001 khan Mizoramah mihring nuai 8.89 kan awm a, 2011-ah nuai 10.97 kan awm bawk a, kum 10 chhunga mihring punna hi nuai 2 chuang awrh chauh a ni.
Kum 2021 khan chhiarpui neih a ni lova, mahse chhiarpuia kan pun dan rate atanga chhutin tun 2025-a Mizorama mihring awm zat hi nuai 14.16 (projected population) anga chhut a ni a. Chuti a nih chuan, kum 2011 leh 2025 (kum 14 chhung)-a mihring punna chu nuai 3.19 vel chauh tihna a ni.
Heta tang hian kan hrethiam tawh mai awm e. Kum 14 chhunga Mizoram mihring punna aiin kum 10 chhunga ILP pekchhuah zat (5.11 lakh) hi a tam zawk daih tihna a ni.
Chumi awmzia chu, ni tina ILP pekchhuah zat tur bituk awm mumal lova hetia kan kal reng chuan, tun atanga kum 50 lo awm leh turah khi chuan, ILP nei hnam dang karah a ram leilung fate hi kan inzep ve zeuh zeuh chauh tawhin a rinawm. Red Alert!!!