Imran Khan leh a nupui thiamloh chantir

Pakistani court chuan Imran Khan leh a nupui chu dan kalha innei tiin kum sarih lung in tang turin a ti a. Khan hi thil dangah thiamloh chantir sa a lung ina tang mek a ni bawk.
Court chuan kum 2018 a Khan an Bushra Bibi, faith healer nupui atana a neih chu Islamic kalh leh dan kalh tiin a sawi.
Khan hi eirukna thubuaiah thiamloh changa lung ina tang sa a ni a. Karkalta Nilaini khan Pakistan inthlanpui neih hmain Khan te nupa chu state gift atanga hlawkna lo tel tiin thiamloh chantir an ni tawh bawk.
Kum 71-a upa Khan chuan a laka thubuai tam tak siam chu politics thila amah dahthat tumna vek tiin a sawi a. Cricket atanga lara politics luhchilh leh Khan hi kum 2022 khan prime minister atanga paihthlak a ni.
Khan-a tanna Adiala Jail, Rawalpindi ah court siam a ni a, Bibi pasal hlui chuan Khan leh a nupui hlui te inneihna chu dan kalh a ni tia a hek vang a ni.
Muslim family law ah chuan hmeichhiate chuan an pasal te thih hnu emaw inthen hnuah thla eng emaw zah chu pasal dang an neih a khapsak a. Court chuan Bibi chuan danin a remtih hmain pasal a nei a ti.
Kum sarih lung in tang bakah court chuan Khan leh Bibi chu 500,000 rupees chawi turin a ti bawk a.
Kum 2018 khan prime minister atana Khan thlantlin a nih hma lawkin Bibi nen an innei a, Bibi hi spiritual healer kum 40 chho vel niin a hmai a tuam reng thung a, Imran Khan a nupui pathumna a ni.
Imran Khan hian kum 1995 khan British socialite Jemima Goldsmith chu nupuiah neiin kum kua inneiin fa pahnih an nei a. Kum 2015 khan journalist leh BBC weather presenter hlui Reham Khan nupuiah nei lehin kum khat pawh an innei tlinglo thung.
Imran Khan hi thubuai dangah thiamloh chantir niin kum 10 lung in tang tura tih nia tang mek sa a ni bawk.