INC ten ‘financial terror‘ kalpuiah puh

Congress te chuan Narendra Modi kaihhruai Union government leh Bharatiya Janata Party (BJP) te chu Opposition party lian ber te laka ‘financial terrorism’ kalpuiah leh ‘inthlan dawn an inpuahchahna tithuanawpa intluktlanga inbeihna dalsak tum’ ah an puh a ni.
Income Tax (IT) department chuan Congress bank account atangin Rs 65.89 crore an laksak tia sawiin party general secretary (organisation) K.C. Venugopal chuan ruling party chuan ‘khawvela democracy lian ber thu thah a tum’ tia sawiin India ram chu ‘dictatorship raj’ a hnuh luh a tum a ti bawk.
IT department chet dan hi tax dispute thil kal zel a ni a. IT department te chuan kum 2018-2019 assessment year a Congress IT returns-ah felhlel a awm tiin Rs 210 crore chawi turin a ti a ni. Income Tax Appellate Tribunal-ah Congress te chu zualko in IT department action chu stay nghalin Congress bank account chu khawih tawh rih lo tura hriattir an ni.
“Parliament election hma lawka hetiang chetlak hi eng nge a awm zia? Principal Opposition party account chu BJP sorkarin a hijack a ni. Bank atangin kan sum min ruksak a ni” tiin Venugopal chuan a sawi a. Chung sum BJP tena an chhuhsak chu party membership drive neiha crowd funding hmanga an neih a nih thu a sawi a.
“Democratic principles leh values te chuan beih a tawk a. Opposition aw chhuah tihtawp hmak an tum a ni. Hei hi dictatorship example dik tak a ni a. BJP te hian khawvela democracy lian ber chu dictatorship raj ah a hnuk lut mek. Hetiang low-level attack hi history-ah a la thleng ngai lo va, kan bei let ang” tiin Venugopal chuan a sawi bawk.
Congress communications chief Jairam Ramesh chuan BJP te chet dan chu kum 2016 a Uttar Pradesh Assembly inthlan hmaa demonetisation kalpui nen a inzul hle a ti a. “November 2016 demonetisation khan tum pakhat chauh a neia chu chu UP election-ah party dang te che thei lova siam a ni. Chutiang chiah chuan kum 2024 inthlan dawnah pawh Congress te chu sum lama harsaa siam tuma hmalak mek a ni. Hei hi democracy thah tumna a ni” tiin a sawi.
Ramesh chuan IT department chet lak dan hian tihlan a neih chu BJP sorkar chu Bharat Jodo Nyay Yatra, farmer’s movement leh inflation sang zel bawk si avangin a hlauthawng hle tih a ni a ti a.
Hei bakah hian Modi sorkar chuan company 30 a dap thut thut leh IT department, Enforcement Directorate, leh Central Bureau of Investigation te hmangin Rs 335 crore donation a hmuh phah tawh a ti bawk a.
“Opposition te ruksak a, BJP sum bawm tihkhah duh vanga donors te blackmail hi democracy hmun thima dahna a ni. Hei pawh hi a tawp thlengin kan beilet ang a, court ah leh mipui court ah kan bei zel ang” tiin COngress president Mallikarjun Kharge chuan a sawi bawk.
Press Conference neihnaah Congress treasurer Ajay Maken chuan IT department te chetdan chu ‘rukru’ tia sawiin an chetlak hunah zawhna nei bawkin, tax demand an siam chu 2018-19 tax filing daih tawh kha a ni a ti a.
“Kum nga hnuah inthlan hun puan hma karhnih lekah kan sum min laksak a, kan sum te hi kan lalet leh thei em em dawn a, mahse, kan laklet leh meuh chuan inthlan a zo tawh ang,” tiin Maken chuan a sawi.