Independent kan puan khan Zofate chenna a huam vek – Tawnluia

Independent kan puan khan
Zofate chenna a huam vek
– Tawnluia
MNF-in zalenna a puan khan Zofate chenna hmun zawng zawng a huam vek tih deputy chief minister Tawnluia chuan a sawi.
Zirtawpnia MNF office – Mizo Hnam Run inkhawmah MNF senior vice president ni bawk Tawnluia chuan independent an puan khan Zofate chenna hmun zawng zawng a huam vek a. Zohnahthlak tam tak ram leh hnam tan ke an penchhuak a, mi tam takin nunna an chân tih a sawi. Zofate chu pakhat kan nih zia a lang telh telh bakah Pathianin thisena a phuarkhawm kan ni tih a sawi a. Hmun hrang hrangah awm rih mah ila, thinlungin kan inzawm tlat a. Rorelna pakhat hnuaia kan awm hi MNF chuan a beisei reng a, a dintirh atanga champion pui a tum reng a ni, tiin a sawi bawk.
“MNF leh India inremna ziah a nih dawn khan, Zofate rorelna pakhat hnuaia awm hi kan khel ber a ni a. Rei tak kan khel ho hnu ah, state ramri tih danglam chungchang hi Indian Constitution Article 3-ah tarlan a nih tho avangin inremna ziah a ni thei ta a. Zofate rorelna pakhat hnuaia awm hi MNF constitution-ah a inziak a. Tun thlengin India sawrkar hi kan la nawr reng a ni,” a ti.
Political party dang chuan development leh thildang chungchang thiam tak takin an sawi a ni mai thei a. MNF erawh chuan an thupui ber chu ‘nationalism’ a ni tih MNF hruaitu hian sawiin, “Hei hi kan danglam bikna a ni. Kan unaute tihduhdahna leh nekchepna, tawrhna hian kan mittui a titla a. Ram leh hnam chhan tur hian tumah kan tlanchhe dawn lo tih a tilang. Tuma tirh luih niloa, hmannia khati zat kan pungkhawm thei khan hnam thila kan tanrual zia a tarlang chiang hle,” a ti.