India-ah Macron, Thawhlehniah Modi-a nen inbe dawn
India-ah Macron, Thawhlehniah Modi-a nen inbe dawn
French President Emmanuel Macron-a chuan Thawhtanni hian India tlawh turin Mumbai a thleng dawn a, Thawhlehni hian Prime Minister Narendra Modi-a nen an inkawm dawn tih external affairs ministry chuan a sawi.
An inkawm zawhah Modi-a leh French president hian New Delhi an pan dun ang a, AI Impact Summit 2026-ah an tel dun leh dawn a ni.
External affairs ministry (MEA)-in a tar lan dan chuan Mumbai-ah hian hruaitu pahnihte hian inremna thuthlung an siamte an sawi dun ang a, thuchhuah intawm an siam zui dawn.
Taj Mahal Palace khualbukah India-France Innovation Forum hi nghah a ni ang a, Gateway of India-ah India-France Year of Innovation & Cultural Commemoration chhunzawm a ni ang.
Macron leh First Lady Brigitte Macron hian Ningani thleng India an châm hun chhungin Mumbai leh Delhi an tlawh dawn niin ministry chuan a tar lang.
Year of Innovation 2026 hi ram pahnihte hian kumin chhung zawng an lawm dawn a, thil leh tih dan thar chin chhuahna, technology, zirbingna leh an ram mite ve ve intlawhpawh tawn tam lehzual theihna tura ram pahnih thawhhona a ni.
Tun hi Prime Minister Modi-a’n a sawm anga Macron-a’n India a tlawh vawi lina a ni a, India-France inkungkaihna pawimawh bika thawhhona neih dan tur te, Artificial Intelligence (AI) leh technology chhuak thar mek zela thuk zawka inpawh dan turte an sawiho dawn a ni.
Zirtawpni khan India-a French Embassy chuan Macron-a hian India hi ram hnih inkara inkungkaihna siam tur leh AI Impact Summit-a tel turin a tlawh dawn niin a sawi a, New Delhi leh Paris inkar chu a hnai lehzual dawn niin X-ah a tar lang.
Macron-a’n India a tlawh hun hi ram venhimna, van thengreng, civil nuclear energy, sik leh sa kaihhnawih, zirna leh an mite ve ve inpawhna kawnga thuk lehzuala India leh France ten inkungkaihna an neih mek lai a ni.
India-a French Embassy chuan President Macron-a’n India a tlawh hmasak ber, kum 2018 khan France-India inkungkaihna chuan bung thar a kai tih an tar lang.
Hetih lai hian India-in AI Impact Summit a thlen tur hi February 16 leh 20 inkara neih tur niin ‘sutra’ pathum – People, Planet leh Progress tih chu an thupui niin ‘chakra’ pasarih siam tum a ni tih MEA thupuangtu, Randhir Jaiswal-a chuan a sawi.