INDIA alliance insiamrem mek zel
Congress te chuan Samajwadi Party (SP) leh Aam Aadmi Party (AAP) te nen thawhhona thuthlung an ziak fel ta a, mahse, harsana namenlo an la hmabak tho. Opposition party lian ber te chuan Bengal leh Maharashtra ah seat insem chungchangah chinfel turin hun an nei tlem hle tawh a. Lok Sabha inthlan thla reilote hnuah awm dawnin BJP election machinery turu tak hmachhawn turin INDIA bloc in campaign an la nei thei lo.
Bengal zawhna
Bengal bikah Congress te chuan Trinamool Congress te chu an rim nawn leh a. Trinamool COngress chief leh Bengal Chief Minister Mamata Banerjee chuan a hma in inthlan party malin an chuh dawn tiin a lo puang tawh thung a. State Congress unit leader Adhir Ranjan Chowdhary chuan seat 10 a ngiat laiin TMC ten seat hnih bak pek an tum si lo a ni.
Chowdhury chuan Trinamool chief chu sawiselin ‘opportunist’ qa tihkhum hnuah Banerjee chuan Congress te chuan an rawtna tin an hnawl vek tiin, “Bengal bikah chuan party mala inthlan hmachhawn kan tum” tiin alo sawi tawh a.
Khata tang khan Congress leadership te chuan Banerjee chu rim nawn lehin Rahul Gandhi chuan Chowdhury tawngkam natak chuan awmzia a nei lo a tihial a.
Chowdhury thung chuan TMC chuhngah ngaihdan phir a awm a, an tichiang thei lo a ti thung. “Rilru pangkhingin an awm a ni. official in alliance a tel loh thu an sawi a. An buaina hmasa chu party mi leh sa thenkhat ten party mala din a nih chuan INDIA alliance te tello chuan West Bengal a minority ten an vote dawn lo an ti a. |henkhat chuan TMC ten party aia INDIA bloc ngaih pawimawh a nih chuan Modi chuan anlakah ED leh CBI te a hmang dawn an ti thung a, heng thil pahnih ngaihdan in ang lo avang hian TMC te hian thutlukna chiang an siam thei lo” tiin a sawi.
Seat insem avanga buaina chuan Banerjee in Rahul Gandhi kaihhruai Bharat Jodo Nyay Yatra ah pawh a tel loh phah a ni.
Maharashtra
Maharashtra ah pawh INDIA bloc chuan seat-sharing plan an la nei hleithei lo. Maha Vikas Aghadi, Shiv Sena (Balasaheb Uddhav Thackeray) leh Sharad Pawar-led faction of NCP te pawh telna te chuan sawihona hnuhnung erawh an nei tawh thung a.
Rahul Gandhi chuan Thackeray be tawhin Congress te chuan Mumbai a Lok Sabha seat paruka pathum – Mumbai South Central, Mumbai North Central leh Mumbai North West seat chan an duh a. Thackeray chuan State a Lok Sabha seat 18 chan a duh thung a, chung zinga pali chu Mumbai ah niin Mumbai South, Mumbai North West, Mumbai North East leh Mumbai South Central te an ni.
Maharashtra a INDIA bloc tana pawi em em chu party lian pahnih Shiv Sena leh NCP te chu keh phelin an leader Uddhav Thackeray leh Sharad Pawar te chuan an party hming leh symbol an hloh ve ve bawk. Hei vang tak hian an party hming thar leh symbol thar a bik takin thingtlang lam mite hnena hrilh hre turin an chet vat a ngai dawn a ni.
Chinfel tawh
A thlaa thla inbiakna neih a nih hnuah Congress te chuan INDIA forces a party lian pahnih SP leh AAP te nen seat insem dan tur an tifel tawh thung a. Uttar Pradesh-ah chuan seat 80 awmah Congress ten seat 17 an chang ang a. Madhya Pradesh ah Akhilesh Yadav kaihhruai party chu seat khat an pen thung bawk ang. AAP nen pawh Grand Old Party chuan Delhi, Gujarat, Haryana, Chandigarh leh Goa-ah te seat insem dan tur an tifel tawh bawk a. Punjab ah erawh a inremna nei lovin an inbei thung ang.
Delhi Chief Minister Arvind Kejriwal chuan Punjab vangin buaina an nei lo a ti a. Delhi ah chuan seat sarih awmah Congress ten seat thuman chang ang a. gujarat ah chuan seat 26 awmaqh AAP ten seat hnih an chang ang a. Haryana-ah chuan Congress leh AAP te chuan seat 8 leh seat khat an chang thung ang. Inremna ang chuan Chandigarh seat leh Goa a seat hnih chu Congress ten an chang ang.
INDIA alliance tan Lok Sabha inthlan a hnaih tawh em avangin seat-sharing an chinfel vat a tul tia sawi a ni.