India democracy dinhmun derthawng ti

CPI (M) Politburo member Prakash Karat chuan Narendra Modi leh BJP tena thuneihna an chang leh a nih chuan India chu democracy ram a ni tawh lovang a, tun Lok Sabha inthlan hian India hma lam hun a hril dawn a ni, a ti.
Madurai-a Lok Sabha Constituency a Su. Venkatesan tana campaign-a thusawina a neihah BJP te chuan inthlan hmain opposition te chu harsatna an siamsak char char a ti bawk a. Arvind Kejriwal leh Hemant Soren te manin an awm a. Election campaign kalpui mek laiin opposition leader te chu Central agencies ten an umzui zel a ni a ti bawk.
BJP-te chuan democratic takin opposition te chu an bei lo reng reng a, an rapbet a ni tia sawiin Karat chuan Income Tax Department chuan Congress bank account khawih chettheih lohin an dahsak a ti bawk a.
Kerala-ah pawh IT Department te chuan CPI(M) account Thrissur district-ah khawih chet theih lohin an dahsak a ti bawk a. BJP te chuan Central agencies Enforcement Directorate, Central Bureau of Investigation leh IT Department te hmangin opposition te chu che thei lova siam an tum a ni a ti bawk.
“BJP kalh zawnga Parliament-a thu an sawi avangin opposition leader te hnawhchhuahin an awm a. Media mite leh civil rights activists te pawh lung in-ah khungin an awm a. Khawvel huapa democratic freedom enfiah tute chuan an sawisel nasa a ni” tiin Karat chuan a sawi bawk.
BJP leh Modi-te chuan an election campaign-ah Ayodhya Ram Temple chu an hlawhtlinnaah an chhuah a. State-sponsored function a ni chungin Modi chu ‘purohit’ ang a che a ni. Temple hawnnaah opposition te an tel ve duhlohah BJP te chuan an sawisel a, opposition leader-te tel duh lohna chhan chu political project- sakhuana leh communal agenda politics chawhpawlh a nih vang a ni.
BJP te hian Constitution hnawlin Manuvadi ideology kalpuia India chu ‘Hindutva Rastra’ a chhuah an tum a ni.
Modi leh BJP te chuan INDIA bloc chu corrupt party inthurualna tiin an sawi a. Mahse, electoral bond lailan hmangin BJP te chu India rama ‘most corrupt party’ an nihzia lailanin a awm thung. Dan siam thain electoral bond kha an kalpui a ni a, CPI(M) chuan duh lovin Supreme Court-ah a khing reng a ni.
Electoral bonds scheme chu kum ruk an kalpui hnuah Supreme Court chuan constitution kalh a ni, a ti a, a hnawl ta a ni. Electoral bonds atanga 50% aia tam chu BJP te dawn leh hmuh a ni a. Chung an sum te chu mipui vau nan an hmang zui a. Supreme Court hian electoral bonds hmanga pawisa chheprelh leh eirukna chhui chiang tur investigation tem din rawh se.
Tun inthlan tur hian India chu Union of States a ni zel ang em federalism a la awm zel dawn em tih a hril dawn a ni. BJP te chuan federalism nuaiboa unitary India din an tum a ni.
BJP leh RSS te hian one nation, one languages leh one culture policy kalpui an tum a, chu mai bakah one election kalpui an tum bawk. Federal structure tichhia in an kal ang a. Governor te chu tun hmaa Viceroys te angah khan hmangin tuilian avanga tawrhnaah Tamil Nadu pawh fund a pe duh lo a ni tiin a sawi bawk.