India laka him nan Pakistan sipaite an inring
Pahalgam-a mi firfiakten mi 26 an thah hnua India nen an inkar a khik mek karah sipai chakna hmanga an beihna a thlen pawha inven nan Pakistan chuan ramri-ah boruak venhimna hmanruate a chhawp hnai nia sawi a ni.
Pakistan Air Force hian nunchan pawh vawi thum – Fiza-e-Badr, Lalkar-e-Momin leh Zarb-e-Haidari an tih zir tawhin hetah hian an indo thlawhna zawng zawng an tel a, F-16, J-10 leh JF-17 te pawh an tel niin India Today-in a tar lang.
Nunchan hi April 29 atang khan zir tanin Saab an tih, van lama beihna an tawha inralrinna pe thei leh thlawhna thununtu pawh an chhawp chhuak.
Pakistan Army Strike Corps pawhin an huam chhung theuhva training an nei thar nasa nia sawi a ni bawk.
Pakistani sipaite hi Indian Prime Minister Narendra Modi-a’n a sipaite chu April 22-a beihna an tawh, Pakistani-in a puih firfiakte tih nia an chhal phuba lakna turah zalenna a pek atangin an inring thar hle a ni.
Pakistani sipaite hian lei lama an thil neihte leh an air base-te a him nan Airport Security Force pawh veng turin an chhawp lut bawk.
China atanga an lei, SH-15 howitzer pawh Pakistan Army kutah awm tawhin ramri hnaih hmunahte a enkawltute nen an dah.
Pakistani sipaite hian India nena an inrina hnaihah hian air defence system leh laipuite pawh an chhawp hnai a. India ram chhung, Rajasthan-a Barmer hnaiha Longewala sector, an ram chinah radar system leh air defence weapon system pawh an chhawp nia sawi a ni.
Pakistan hian an sipaite chu India nena an inrinaah a ko khawm bawk a, an lawng sipaite pawh ram pahnih inkar hi a chhiat zel palha che chhuak thei turin an inrintir bawk.
Pakistani Information Minister Attaullah Tarar-a chuan ‘thu rintlak tak’ an hriat atangin India hian sipai chakna hmangin a bei thut thei reng tih a sawi.
Pakistani sipaite hian an radar system-te chu Indian thlawhnate an kahna an lo hriat vat theih nan ramri hnaih, Sialkot sector-ah an dah tawh bawk.
Pakistani firfiak pawl, Lashkar-e-Taiba (LeT) peng pakhat, The Resistance Force (TRF)-in an tih nia an chhal, Pahalgam beihna a thlen hnuah India leh Pakistan inkar hi a chhe telh telh.
India chuan Indus Waters Treaty titawp lailawkin Pakistani-te India-a an awm a phalsak lo va, an embassy-a hnathawka awmte titlemin a chung boruak chu Pakistani thlawhna tan a khar bawk.
Pakistan pawhin 1971 Shimla Pact a titawp a, a chung boruak chu Indian thlawhna tan a khar bawk.
Pakistan hian Pahalgam beihnaah khan inrawlhna a neih loh thu a sawi a, a hrana tan bik nei lova chhui ni se tiin a rawt nghe nghe.
Get real time updates directly on you device, subscribe now.
Next Post