India leh Canada inkar tha lo hle

India chuan Canada PM Justin Trudeau-an Canadian Sikh leader thihnaa inhnamhnawih anga a puhna chu na taka hnawlin a chhang let.
Thawhtanni khan Trudeau chuan 18 June-a Canada-a Sikh temple pawna Hardeep Singh Nijar kahhlumah India chu inhnamhnawih angin a chhuah a. Canadian intelligence-te chuan tualthahna leh india ram inzawmna rintlak an nei tiin a sawi.
He thil thleng avang leh Trudeau thusawi duh lovin India chuan Canadian diplomat chu Thawhlehni khan a hnawtchhuak zui nghal a. Canada pawhin Indian diplomat Pavan Kumar Rai chu a hnawtchhuak zui bawk.
Kum 45 a upa Nijjar chu June thla laihawl vel khan Surrey, Vancouver atanga 30km vela hlaa Guru Nanak Sikh Gurdwara a car park-naah tlailamah kahhlum a ni.
British Columbia a Sikh leader langsar tak niin Khalistan – Sikh homeland Punjab tana nasa taka campaign-tu a ni a. Amah thlawptute chuan tun hma pawha vauin a awm fo tawh an ti bawk.
Canada-ah hian Indian origin 1.4 atanga 1.8 million vel an cheng anga ngaih niin, Punjab tihloha Sikh tamna ber hmun a ni bawk.
Trudeau chuan Thawhtanni khan Nijar thihna chungchang chu tun hnai lawka Delhi-a G20 summit neihnaah pawh Indian Prime Minister Narendra Modi a sawipui thu a sawi bawk.
“Canadian leilunga Canadian khua leh tui foreign government kuta a thihna chu kan sovereignty bawhchhiatna niin pawm theih a ni lo” tiin a sawi.
Thawhlehni khan India ministry of external affairs chuan Trudeau puhna chu an hnawl hmak thu sawiin ‘awm ang lo’ leh politics thila lakna tiin an sawi ve thung a. Canada chu Khalistani terrorists leh extremists te India security tana hlauhawm te khawitu tiin a puh let thung.
Sikh te hi India population atanga chhuta 2% vel niin Sikh ram hran hlak hun rei tak ata tawh ngiattute an ni.
Kum 1970 chhovah khan helin mi sang tam takin nunna an chan phah a. India ram pawnah Sikh te chu Canada leh UK ah te an cheng tam hle bawk. India chuan a hmain Nijjar chu terrorist tia sawiin seperatist group-te kaihruaitu tiin a lo sawi tawh bawk.
British Columbia Sikhs Gurdwaras Council thupuangtu Moninder Singh chuan, “prime minister in he tualthahnaa ram dang inrawlhna a awm a ti ngam hi kan lawm hle a ni” tiin a sawi.
Canada-a Sikh group te World Sikh Organisation te pawh telna chuan Trudeau thusawi chuan an community tena an rinhlelh leh chiangsaa an ngaih a sawi lang mai a ni an ti bawk.