India rama bike intlansiak ngaihhlut hlawh MRF MoGrip Supercross Championship kal mekah Aizawl College Veng rider rothap Shaun Lalremruata Chhangte chuan intihsiak kal meka a vawithumna atan round 5-naah lawmman semna dawhsan a lawn leh ta a, India No. 3 a ni pha hial tawh a ni.
Kawng rualrem loa bike intlansiak hautak zet Round ngana hi nimin khan Karnataka khawpui Bengaluru-ah an tlan a, Mizo tlangval hi class pathumah inlanin, Private Expert Class bikah pathumna a ni leh.
Thla hmasa mai October ni 27 khan Madhya Pradesh khawpui Bhopal-a Round thumnaah pahnihna ni tawh bawkin, nimin ni lo, a hmaleh Pathianni khan Pune-a Round lina intlansiakah pathumna a lo ni tawh bawk.
MRF MoGrip Supercross Championship round ruk intlansiak turah Mizo rider hian intlansiak hmachhawn tur vawikhat dang la neiin, round hnuhnung ber hi Cochin, Kerela-ah November ni 30, 2024 zan hian an tlan ang a, thla thar December ni 4-ah Aizawl luh hman a inbeisei.
Kum 23 mi Shaun Lalremruata Chhangte hi Mizoram atanga hetiang inelna hmachhawn hmasaber leh awmchhun niin, a vawikhat inlanaah a chechhe lo bawk a, karliamta Inrinni zana National Supercross Championship Overall Official Result tihchhuahah No. 3 a luah pha hial a, nimin result avangin ranking tharah a kang leh dawn em hriat theih a ni rih lo.
Pathianni intihsiakah Shaun-a hian Bengaluru khuaa Mizo awmte thlawpna leh tawiawmna a dawng tha a, phaitual mai bakah Mizoram lama amah tantu leh ngaihventu a chipuite chungah lawmthu a sawi.
India No. 3 ni thei Shaun Lalremruata Chhangte
Get real time updates directly on you device, subscribe now.
Prev Post