India rama damdawi hming inzul tam lutukin harsatna siam nasa

Tun hnai lawkah Dr. Vincent Rajkumar chuan natna hrang daih ve ve enkawlna damdawi hming inang a hmuh chuan a barakhaih thu a sawi a. Damdawi brand ‘Linamac’ a nih thu a sawi a. Damdawi ‘Linamac 5’ chu cancer chikhat myeloma enkawlna damdawi a nih laiin damdawi ‘Linamac’ tih hming tho pu chu zunthlum enkawlna damdawi a ni thung. Heng damdawi pahnih te hi pharmacy-ah hriat pawlh a nih chuan damloin an tuar nasa thei a ni.
Damdawi hming inang deuh a hnathawh dan dang daih si hman hi India-in a sim hleih theih loh a ni a, medical community-te chuan tum tam tak an lo sawi chhuah tawh a ni.
Doctor tena an sawi lar tak pakhat chu Medzole damdawi brand hming chu a ni a, Medzole tih hming pu hi company hrang hlak paliin a ingredient hrang theuh leh natna hrang theuh enkawlna atan an siam a ni.
Company hmasa ber chuan sedative damdawi ‘medzole’ damdawi Midazolam awmna an siam chhuak a. Company pakhat dangin pumpui thur tam lutuk enkawlna domperidone leh pantoprazole inkawp ‘Medzole-DSR’ an siam chhuak thung a. Company pakhat dangin naupang rulhut hlo damdawi albendazole awmna ‘Medzole 400’ an siam chhuak thung a, company dang palina-in black fungus ang te enkawlna antifungal drugs chak tak Itraconazole telna ‘Medzole 200’ an siam chhuak thung.
Trade name inang deuh hman hi harsatna pakhat chauh a ni zawk a. Hetianga trade name inang deuh a lam dan leh hmel hmang pawh inang tak hman hian harsatna a siam nasa hle.
Company pakhatin paracetamol hralh nan ‘medpol’ brand a hman laiin company dangin corticosteroid damdawi awmna ‘medrol’ brand an hmang ve leh thung a, company dangin antibiotics ‘Metrozole’ an siam chhuak ve leh thung a. Heng damdawi hmingte hi ‘Medzole’ tih nena lam dana inang tak an ni hlawm a, kaihsawih hret chauh an ni hlawm.
Chu mai chu a ni lo va, company hrang hrang ten active ingredient hrang hrang hralh nan hming inang leh lam dan inzul tak an hmang nasa bawk. A chang chuan company pakhatin an brand name hlawhting tak chu an formulation pahnihna hralh nan an hmatheh bawk a. Entir nan, company pakhat emergency contraceptive (ECP) ‘I-Pill’ Levonorgestrel awmna an hralha an hman laiin chumi hming behchhan tho chuan Levonorgestrel leh Ethinylestradiol awmna ‘i-Pill Daily’ tih chu an siam chhuak tho bawk. ECP chu mipat hmeichhiat hman zawh hnua rai dan nana hman thin a ni a, daily contraceptive erawh ovulation leh fertilisation danna tur a ni thung a. Pharmacy tena an hrethiam tawk lo a nih chuan duhloh deuha raina a thleng thei a ni.
Hetianga damdawi hming inang leh lam dan inang tak India rama tam lutuk hian harsatna a siam nasa a. Pakhatnaah chuan India rama damdawi packaging tinte chuan a hming leh prescriptive advice chu English tawngin an ziak vek a, English chu India mipui 10% bakin an hmang thiam lo. Pahnihnaah chuan Indian pharmacy chu regulate that a ni lo bawk. India-a pharmacy te chuan prescription tel lovin damdawi an pechhuak mai mai a, chu chu tihthin dan pangngaia ngaih a ni a, chutihrual chiah chuan pharmacist-te chu danin a phut anga Pharmacy Council of India-a inziaklut lo an tam bawk. Hei vang tak hian damdawi hming inang tam bawk si leh inchawh sual theihna avanga harsatna nasa zawk thlen theihna chu a lian hle a ni.
Damdawi hming inang tam lutuk hi kum sawm tel buaipui tawh a ni a. Supreme Court of India (Cadila Health Care Ltd. vs Cadila Pharmaceuticals Ltd., 2001) leh Parliamentary Standing Committee on Health and Family Welfare tena 59th report (2012) chuan Ministry of Health te chu hriatpawlh a nih loh nan damdawi hming lama fimkhur turin a lo ti tawh a. Company pahnih emaw publication hming inang dan a nih theih nan Registar of Companies leh Office of Registrar of Newspapers for India te chuan system erawh an nei lawi si.
Court leh Parliament in rawtna a siam te chu Ministry of Health in a ngaihthah a, kum 2019 khan Justice Pratibha M. Singh, Delhi High Court chuan Drugs Controller General of India (DCGI) chu he mi kaihhnawihah hian a ko hial nghe nghe a. Pharmaceutical company te pawh hming inang chungchangah an inkhing nual bawk a, India ram court hrang hrangah thubuai a awm tam hle.
Justice Singh hmalakna hnuaiah Ministry of Health chuan Drugs and Cosmetics (Thirteenth Amendment) Rules, 2019 siamin drugs company-te chu khauh zawka an brand name kalpui dan tur siam a ni a. Mahse, chu chuan awmzia a nei vak lo. India ramah pharmaceutical brand-name database a awm tlat lo va, keng kawh tak tak tur chuan Central Drugs Standard Control Organisation [CDSCO] chuan database a siam hmasak a ngai a ni.
Ram changkang zawk United States leh Europe angah te chuan replicating mechanism neiin awlsam takin harsatna an chingfel zung zung thung a. Drugs regulator-te chuan damdawi hmingte chu enfiah sa vekin hriat pawlh leh ngaih pawlh theih tur ang chu an remti lo mai thin.
India ramah chuan damdawi chungchangah prescription errors data pawh a awm lo va, data a awm miau loh avangin harsatna chinfel mai theih a ni lo. Hei vang hian Ministry of Health hnuaia Drug Regulation Section reforms chu tihmakmawh anga ngaih a ni.