India zalen champha 78-na hmang Mipuiin min rin avangin kan lawm – Chief minister

India ramin zalenna a hmuh champha vawi 78-na chu India ram hmun dang rualin Mizoramah pawh hmun hrang hrangah hman a ni a. Aizawla hmanpuitu chief minister chuan a sawrkar chungah mipuiin rinna an nghah avangin a lawm tih a sawi.
Aizawl Sipai Lammuala Independence Day lawmnaah chief minister Lalduhoma chuan, zalenna champhaah Mizoram leh khawvel hmundanga cheng Zofate duhsakna chibai bukin, India ramin zalenna a hmuh theih nana beitute zahna chibai a buk bawk.
A kaihhruai sawrkarah rinna an nghah avangin mipui chungah lawmthu a sawi a. Mipui beisei ang ngeiin “A hmasa berah Mizoram” tih rilru pu chungin hna an thawk dawn a, thla 8 vel chauh sawrkar an kaihhruai chhungin thil inthlakthleng tam tak a awm tawh tih a sawi. Mizoram sum leh pai dinhmun sawhngheta siam tha turin hma an lakna a sawi bawk.
“Kan state economy leh sum dinhmun chawikang turin hmabak tam tak a awm a. Kan sawrkar tirh atang khan sum dinhmun sawhnghet a, siamtha turin hma kan la nghal a. Hemi kawnga sum hmuh leh hmanral inbuk tawk nei tura sum enkawl dan felfai tak neih leh inrenchem kan kalpui chhunzawm zel ang,” Lalduhoma hian a ti.
Chutih rualin, contract employee kum 15 chuang thawk tawh leh provisional employees /muster roll kum 20 chuang thawk tawh dahnghehna tur pawmsak niin, centrally sponsored schemes hnuaia thawkte pawh an ngheh theihna tur draft scheme buatsaih chu pawm tih a sawi. “Sum dinhmun khawih thei thil ni mah se, hun rei tak lo thawk tawhte hi an dinhmun en hian dahngheh an phu a ni,” a ti.
Year of consolidation a ral hnua kalpui tan turin sawrkar hnathawkte DA (dearness allowance) tihpun a ni tih chief minister hian a sawi a. Sawrkarin Universal Health Care Scheme a ngaihtuah mek tiha sawi bawk.
Bana Kaih Policy chu sector hrang hrang tihchak nan an hmang dawn a, thalaite tan eizawnna bul tanna tur kawngka zau takin an hawng dawn tih a sawi. MSME hmalakna lian tak – MSME Elevate Mizoram scheme thar an tlangzarh tawh a, bultanna tur sum puk mamawhtuten awlsam zawka an puk theih nan Mizoram Credit Guarantee Scheme an duangfel a. Bana Kaih policy nen inhne rem turin Mizoram Ceiling on Government Guarantees Act 2011 an siam danglam dawn a, nuai 50 chin loan puk duhte tan sawrkar chu guarantor-ah a tang dawn a, sawrkarin interest a tumsak dawn tih a sawi a ni.
Chief minister hian hnam puanzar pawtpharhin parade contingent 27 chibai bukna a chhanglet a. Kumin hian 10th Bn. Tripura Rifles chu sawm an nih angin an rawn tel a, a vawikhatna atan unarmed contingent-ah Sainik School Chhingchhip zirlaite an tel. Chief minister hian parade-a tithate hnenah lawmman a sem a, zirtirtu tha chawimawina dawngtute leh police thawk tha lawmman a hlan bawk.

Chief minister thusawi dang thenkhat:

8 Hun rei tak atanga tlingkhawm tawh power leina bill ba cheng vaibelchhe 448 kan pe a, a hun taka bill kan pek zui tak avangin, pek tlai vanga chawi belh tur (surcharge) nuai 58 kan hum a, hamthatna (rebate) nuai 35.25 kan hmu let ta zawk hial.
8 Hun engemawchen sawrkarin a lo bat sak tawh health care bill tang cheng vaibelchhe 50 kan pe a, hun rei tak atanga tlingkhawm tawh pension sum ba vbch. 256.75 kan pe chhuak a, GPF tang vanga harsatna tawk sawrkar hnathawkte harsatna hriatpuiin kumin June thleng khan vbch. 359.89 kan pe chhuak tawh.
8 K-deposit a hun rei tak sum tang tawh vbch. 425.49 kan pe chhuak a; MLA Fund atan first instalment vbch.40 kan pe bawk. Sawrkar hnathawk hlawh atan thla tin vbch. 330 vel leh pension atan vbch. 82 vel pek thin a ni.
8 Ration card kalpui dan thar avang hian sawrkar chuan thlatin Rs. 300 lakh vel a hum thei dawn a. He hmalakna hian chhungkaw harsa zawk te a hrut tel dawn lo.
8 Kumin chhungin cheng vaibelchhe 66.82 hu ruihhlo man a ni tawh a. Ruihhlo do hna chak zawka kalpui theih nan State Level Ruihhlo Do Core Committee din thar leh a ni.
8 Thlai/thei thar atanga hlawkna tam zawk kan hmuh theih nan Mizoram Liquor (Prohibition) Act 2019 leh a kaihhnawih dan siam danglam hret tum a ni.
8 Mizoramin investor-te a hip luh tam theih nan The Mizoram Sustainable Investment Policy 2024 kan siam a, kumin February atangin kan hmang tan.
8 Department-ten mipui tana service an pek chhuah thin chu tam lehzual an pek theih nan Mizoram Right to Public Services Act 2015 hnuaia service pek theih zat chu 140 atangin 192 a tihpun a ni.