Indian football-ah match-fixing!

Indian football-ah match-fixing!
Khelmuala invawrh tak tak thei lawi loin a chhehvelah Indian football pawhin a buaipui tawk harsatna a tawk indawt chho ve reng a! Tunah pawh match-fixing sawirik a ni leh tawh a, All India Football Federation (AIFF) lamin an chhui mek.
Thawhtanni Delhi league match pakhata Ahbab FC leh Rangers FC inkhel chuan rinhlelh a kai nasa mai a; 4-2 laia Ahbab chakna goal lut tlai fe fe pahnih kha own goal niin, Delhi Premier League-a betting leh match-fixing puhna a rikchhuah hnu Thawhlehni khan AIFF chuan a chhui hna a kalpui nghal a, a zung chawpa phawi fai leng tumin ram chhunga khawpui hrang hrang lamah pawh mit an len zui nghal.
Rangers FC leh Ahbab FC inkhela own goal lut lai video footage pahnih a darh hnuah AIFF chuan Thawhlehni khan Football Delhi chief Anuj Gupta ko nghalin, match a rinhlelhawm dan sawifiah turin an hriattir.
AIFF president Kalyan Chaubey chuan football-a pawisa thapna dik lo a zung chawpa pawtphawi turin Anti-Corruption Bureau (ACB) lam a pun tawh a, anni lam hian investigation an kalpui ve ta bawk tih a sawi.
Chaubey chuan, “Kan investigation hi Delhi-ah mai a tawp dawn lo a, evidence hrang hrang kan hmuh behchhanin match-fixing hi khawpui dangah pawh a awm ngei tih rinna kan nei a, he thil chhuina hi a darhzau thei ang bera kalpui a ni ang,” a ti.