Indian national football team tana goal thun thei naupang zual pangate

Indian national football team tana goal thun thei naupang zual pangate
June ni 21 atanga July ni 4 chhung hian Bengaluru khaw-puiah South Asian Football Federation (SAFF) Cup an khel dawn a, Indian national football team boruak hawina ni pahin Mizo footballer pahnih telna Blue Tigers tana goal thun thei naupang zual pa-ngate thlirho teh ang.
Tunhnai kum engngemawti liamta chhung khan Indian national football team-ah hian young talent tih tur an lo chhuak nual tawh a, senior team-a an chhoh hma keipui an nih hma Blue Cubs hun lai atanga thlir hlawh tawhte an ni hlawm a; chu’ngho chuan ei an rawn tling chho a, Indian senior men’s football history-a goal khung thei naupang an rawn ni chho tak tak a, i han belchiang dawn teh ang.
5. Pradip Kumar Banerjee
PK Banerjee tia hriat lar hi kum 1961-a India rama chawi-mawina ngaihhlut hlawh Arjuna Award hmasaber an semchhuah tuma dawngtu pakhat niin, a career-ah Indian national football team tana goal thun thei naupang ber leh upa ber a lo ni tawh.
Kum 19 leh ni 177-a upa a nih laiin 1955 Colombo Cup-ah tuna Sri Lanka ni ta, chutih laia Ceylon lakah goal hnih khungin, Dhaka khawpuia a goal thun hmang khan a hun laia India tana goal khung thei naupang ber a ni.
Kha tournament-ah khan Banerjee hian Sri Lanka leh Burma laka goal hnih ve ve a thun hnu final-a Pakistan an sut tumin Blue Tigers tan goal khat a thawh leh a, a team chu 2-1 hnehna chanpuiin, a tum lina atan India kutah Colombo Cup title a lut zui nghe nghe.
4. Bhaichung Bhutia
Kolkata khawpuia Nehru Cup vawi 11-na nghah a nih tum khan Indian icon Bhaichung Bhutia hian a vawikhatna atan Blue Tigers tan a inlan tan.
He tournament-a an match hmasa-berah India chuan Sikkimese Sniper goal khat thun hmangin Uzbekistan lakah 1-0 hnehna an sualchhuak a, kha goal a tihluh laia kum 19 mi Bhaichung chu khatih lai khan Indian national foot-ball team tana goal khung thei naupang ber a rawn ni chho ve leh.
An match hnihna leh an group stage match hnuhnung zawk ni nghalah sithum faiin Russia lakah an tlawm zui a, an group-a palina ni chungin India tan tournament a zo.
3. Lallianzuala Chhangte
Kum 2015 December ni 27 a ni a, Lunglei tlangval Lallianzuala Chhangte chuan Trivandrum khawpuia SAFF Championships group A match pakhata India leh Nepal insut tumin goal a khung a, Indian senior men’s football history-a goal khung thei naupang ber thar ni turah mi tamtakin an ngai nghal thup a, mahse, tluk loh dang a la nei – a chipui Jerry Zirsanga aiin a lo upa hret tih hriatchhuah a ni.
Kha game-ah khan Nepal lamin goal hmahruai an thun hnuah Rowllin Borges leh Sunil Chhetri-te goal khat ve ve tihluh hmangin Stephen Constantine-a team khan hma an hruailet a; second half minute 81-ah dinglam sir atanga tlanlut Mizo star Zuala chuan mawi taka ball chawk kual chungin a ke veilam a lekchhuak a, goal kham hnuai chiahah kual nalh takin a hlap lut.
Minute 90-ah Mizo star bawk hian Rowllin-a ball chhawpsak hmangin a goal hnihna a tauhlut zui leh.
Mumbai City FC star player hian kuminah ISL Golden Ball dawngin, ISL Hero of the League chu Bhaichung Bhutia kut atangin a la a, Narender Gahlot lo lan hma zawng khan Blue Tigers tana goal khung thei naupang ber dawttu a ni.
2. Narender Gahlot
July 16, 2019-a Ahmedabad khuaa India Intercontinental Cup league game hnuhnungberah khan Syria lakah Gahlot hian goal khungin, EKA stadium-a Anirudh Thapa corner chhuih a tauhluh lai khan Narender Gahlot kha kum 18 leh ni 83 chiaha upa niin, kha goal avang khan India senior team tana goal khung thei naupang ber dawttu a ni.
Minute 51-a Gahlot goal khat tauhluh hmangin mualneitu team-in hma hruai mah se minute 78-ah Firas Al-Khatib chuan Arab team siphurh a sut a, chak zawk awm loa team pahnih inhneh-tawkna inkhelah khan a career-a a vawikhatna atan player of the match award a dawng nghe nghe.
Indian Super League (ISL) lamah a inlan zui a, Odisha FC thuam a inbel.
1. Jerry Zirsanga
Kum 16 leh ni 311 chiaha upa a nih laia a goal khung hmangin Mizo midfielder Jerry Zirsanga hi tun thlengin India tana goal thun thei naupang ber a la ni ta zel.
Indian football-a mellung a phunna goal kha November 2004 daih tawha mualneitu Kuwait nen friendly match an khelh tuma a tihluh niin, Gulf team laka 1-2-a an hnufual laiin khatih laia India head coah Stephen Constantine khan thil engngemaw tak a tih ngei a ngai a, chutah Jatin Singh Bisht lachhuakin substitute bench lama thu Tata Academy product Jerry Zirsanga a luhtir a, second half tir lam minute 66-ah Khawlailung rawlthar chuan history thar a siam zui ta mai a ni.
Ding lam sirah hmunawl insiamin a dawkchhuak thut a, Men in Blue siphurh a sut a; minute 75-ah Abhishek Yadav rawn inlar ve lehin, hun a tawp meuh chuan mualneitu Al-Azraq lakah 3-2-in Zirsanga telna India team an chak.
Zirsanga zinkawng
A ball thiamna leh hmun-awl a insiam thiamna kha langsar teh mah se national set-up lamah a langsar zui ta lo tlat a, India senior team tan pawh vawinga chiah inlanin, goal khat a thun a, kum 28 mi lek niin international football a chawlhsan zui ta nghe nghe.
Zirsanga hian Chirag United SC-ah a footballing career tanin 2010-11 I-League season a khel a; kum 2010 December ni 24 khan I-League game-a sikhat faia HAL an hnehna goal awm-chhun chu Lalkamal Bhow-mick pass atangin a thun.
He mi hma hian 2004-2006 season khan Mohun Bagan-ah a inziaklut a; 2006-2010 lamah chuan Dempo player ni zui lehin, India club lar pahnih tan hian game a khel lo!
Chirag United-ah pawh khan season khat chauh awmin, game 10 khelhah goal khat a tilut a; 2011-2012 season-ah chuan Churchill Brothers SC lamah a insawn a, he team-ah pawh hian rinrawl a ni pha lo a, game ruk chiah a khelhsak.
2012-2013 chhung khan Luangmual player ni tura ziahluh niin, match a khel lo a; kum 2013 atangin Kolkata club Mohammedan Sporting-in an lalut a, 2013 I-League 2nd Division Final Round-ah a tangkai a, an team kaisanna kawngah a thawhlawk ti ila game sarihah goal khat khungin, khami kum April ni 8-a Shillong club Rangdajied United FC laka 1-0 hnehna goal kha a tihluh a ni.
India Under 20 team tan game nga khelin goal khat a thun a, kum 2004 khan South Asian Games silver medal a awrh.