Indian Paralympics contingent

Nimin, Paris 2024 Paralympic Games tan ni khan gold medal 22 semchhuah nghal niin, India pawh tuntum hian a thawkrim ve hle a, opening ceremony-ah shot-putter Bhagyashri Mahavrao Jadhav leh javelin throw star Sumit Antil-te’n flag kengin 179-strong Indian contingent hma an hruai.
Antil hian Tokyo Paralympics-ah khan javelin gold awrhin, Jadhav hian China-in Asian Para Games a thlen tum khan shot-put silver a dawng thung.
Tuntum Paris hi Paralympic Games history-a India contingent lian ber niin, sport chi hrang 12-a medal chuh turin infiammi 84 an thawkchhuak.
Paralympics hnuhnungber Tokyo-ah khan India chuan gold medal panga telin medal 19 a hlawhchhuak a, kumin hian gold medal double digit nen a lo berah pawh belhkhawmin medal 25 tal an beisei mek a ni.
India hmeichhe zinga Paralympic gold la hmasaber ni tura Tokyo khawpuia hlawhtling rifle shooter Avani Lekhara (10m Air Rifle Standing SH1) kha Paris-ah hian India gold beiseina lian a ni leh mek a; lawmman semna dawhsan lawn pha tura beiseiawm dang zingah a pian hlim atanga ban a neih loh avanga a ke hmanga thal kap thin para-archer Sheetal Devi leh rahpuah bomb atanga damkhawchhuak hram ve ve Hokato Sema (shot putter) leh Narayana Konganapalle (rower)-te an tel.
Nikum Hangzhou khuaa Asian Para Games-ah India a chetha a, record siama medal 111 a lak zingah gold ngawt pawh 29 a tling ve a, kha vang khan Paris Paralympics 2024-ah hian tunhma zawng aiin beiseina a sang lo thei lo a ni.