Indian Wells title humtu Swiatek

Inrinni final-ah minute 69 lek chhunga 6-4 6-0-a Maria Sakkari hnehin Iga Swiatek chuan Indian Wells trophy a kawl lai a humhim.
Ti hian, Poland nula Swiatek hian nikum December ni 30 hnu lama singles game 22 a khelh tawhah vawihnih chiah a la tlawm a, California lama 2022 final rematch-ah pawh Greek nu rothap lakah Pole hian harsatna a tawk lo a, nuamsain world number one hian a career-a a title 19-na a hlawhchhuak.
Kum 22 mi Swiatek hian thla hmasa mai khan Qatar lamah title la tawh bawkin, tuna a title kawl lai a humhim leh thei mak a tih thu sawiin, a inpui ang maia a ngaih hial tawh thu a tarlang tel.
Inrinni final kha kum 28-a upa Sakkari tan WTA final vawi 10 a khelh tlinna chiah niin, a career-a a title pathumna tur erawh California ramah a sualchhuak zo ta lo a, a hneh loh four-time Grand Slam champion fak mai loh chu inkhelh banah pawh sawi tur a nei tam lo!
World number nine Sakkari chuan Iga nena final match an la khelh zui zel theih a beisei thu a tarlang tel.
Kumin January thla Australian Open third-round paltlang zo loa a tlak ngawt hnu khan Swiatek a insiamtha a, US tournament dang Miami Open a beisei zui leh nghal dawn a, he hmunah hian kum 2022 khan ‘Sunshine Double’ an tih zinga palina ni tur leh a hmaa mihuai kal hmasa pathum – Steffi Graf, Kim Clijsters leh Victoria Azarenka-te hnungzui turin hnehna a lo chang tawh a ni.