Indiana Pacers tan final a hnai

Nilaini zing khan Eastern Conference play-off game lina khelh a ni a, inkhel hmuhnawm takah India Pacers chuan New York Knicks an hneh nawn leh a, Series ah 3-1 a hmahruaiin an tan NBA final a hnai leh zual.
Conference final game linaah mualneitu Indiana Pacers leh an mikhual New York Knicks ten inkhel hmuhnawm tak an lantir a, quarter khatnaah point an thawkchhuak tam dun nghal hle. Mualneitu Pacers in quarter khatnaah point 43 lai an thawkchhuak a, point 8 in chungnung zawkah an tang nghal. Quarter hmasa berah point thawkchhuak tam dun viau mah se quarter hnihnaah an indang chat tawn a, point an thawkchhuak tam thei tawh lo. Quarter hnihnaah hian point thumin Knicks an chungnung ve thung. Quarter hnihnaah hnufual zawk ni bawk mah se Pacers in point 5 a hmahruai chungin chawlhlawk an hmang.
Chawlhlawk hnu lamah an inhnehtawk zui viau a, quarter khat ve ve an la zui leh Quarter thumnaah point 6 in Pacers an chungnung a, point 11 in an mikhualte nen an inkar an tizau. Quarter hnuhnung berah New York Knicks in an khingpuite lehthal ngei tumin tan an khawh nasa hle a, point hnihin chungnung bawk mah se an khingpuite hi point 9 in an umphak zo ta lova, game linaah tlawm zawk niin, series-ah 3-1 in an hnufual zui ta a ni.
Final game linaah an chak vangin Indiana Pacers in NBA final an hnaih leh zual a, khelh hmabak game thum la awmah vawi khat chak chiah an mamawh tawh. Zirtawpni a khelh tur final game nganaah an chak a nih chuan kum 2000 hnu lama a vawi khat nan NBA final an lut ang. Hnufual zawka tang mek New York Knicks tan pawh final luh theihna kawng a la inhawng a, final lut turin an khelh hmabak game thumah chak vek an mamawh tawh thung a, fiahna hautak zawk an paltlang a ngai dawn.
New York Knicks lakah a vawi thum nana an chak theih nan Pacers tan Tyrese Haliburton a thawhhlawk viau a, treble-double a puitlin. Tyrese Haliburton hian Knicks lakah point 32 a thawkchhuak a, assist vawi 15 a neih bakah ball sawhlet vawi 12 a dawng tling bawk a, a chetha hle. Pacers tan hian Pascal Siakam chuan point 30 a thawkchhuak a, Bennedict Mathurin chuan point 20 a thawkchhuak ve bawk. Knicks tan hian Jalen Brunson chuan point 31 a thawkchhuak ve thung. Jelen Brunson tan mimal a chetthat a tawk zo lo.