Infiamna thlan bik neihah sawrkar a inher rem dawn – Sports minister

Eng sports discipline-ah nge sang zawka hming kan chher ve theih anga, eng infiamna nge thalaite eizawnna siamsak thei tura kan uar bik ang tih ngaihtuah chungin sawrkar a inher rem dawn tih Sports & Youth Services minister Lalnghinglova Hmar chuan a sawi.
Aizawl District Hockey Association buatsaih Zoliana Royte Memorial Indoor 5S Hockey Tournament a hawnnaah Sports minister hian Mizoramin infiamna a buaipui dan chu thlak hret hret a ngai tih sawiin, “Eng sports discipline-ah nge India leh Asia, khawvel huap thlenga hming kan chher ve theihna ni a, eng infiamna nge thalaite eizawnna siamsak thei a, kan uar bik ang, tih ngaihtuah chungin sawrkar a inher rem dawn,” a ti.
India-in in Olympic Games 2036 thlen a tum a, Mizoram atanga infiammi tam thei ang ber tel ve an duh tih sawiin, eng infiamnaah nge India a that a, eng game-ah nge kan lo inbuatsaih ang tih uluk takin sawrkarin a ngaihtuah mek tih a sawi. Hockey chu khawvel huapa India thatna a nih angin, Vision 2036 Olympic Games-a infiamna thlan bik tur zingah a tel tih a sawi a ni.
Hmeichhe hockey-ah Mizoramin Olympian a neih bakah a khat tawkin international player kan nei reng a, mipaah erawh tan lak a la ngai tih Lalnghinglova Hmar hian a sawi. Kawnpuia Boys Hockey Academy chu tha zawk leh changtlung zawka kalpui tumin thawhpui tur (partner) zawnga hma lak mek a ni tih a sawi a ni.
Aizawl District Hockey Association president Lalrampari chuan Mizoram hockey thlen chin a sawi a. A bikin hmeichhe hockey leh international leh national umpire, coach chhuanawm tak tak engemawzat an awm a. India team-ah pawh senior leh junior ah Mizo hmeichhia an tel tih a sawi a ni.
Indoor 5S Hockey tournament-ah hian mipa team 18 leh hmeichhe team 15 an chhuak a, pool pali-ah ve ve then niin, pool tina a sangten knockout stage an khel dawn a ni. August 24-ah final khelh tum a ni.