Inkungkaihna leh thawhhona

Aizawl Municipal Corporation chuan khawpui thianghlim leh hrisel, khawpui fai leh mawi, rimtui a awm theih nan khawpui chhunga vawk vulh danah inkaihhruaina a siam a. Chenna in atanga feet za aia hnaiah vawk vulh loh tur a ti a. Aizawl khawpuia chenna in bit em em karah hian, chenna in atanga feet za aia hnaia vawk vulh theihna hmun hi a awm lo tluk a ni a. Khawpui daifem, kawmthlang nei ve tawh lo chin chuan vawk vulhna hmunte chu an nei mahna.
Khawpui smart kan duh a, chumi atan chuan smart city project te kan ti a, kawngpui kamah tui herh chhuahna khawl te kan bun a. A lehlamah chuan vawk ek leh zun rimchhe tak nen kan inchiahpiah leh nuaih tho a; kan smart tak tak thei lo. Town leh City huam chhunga ‘village council’ neih tlat ang vel kha a ni awm e.
Vawk vulhtute hi dem ngawt theih an ni lova, khawpui chhungah hian mirethei tam tak an awm a, heng urban poor-te dinhmun ngaihtuahtu tur hi UD&PA dept a awm bawk. Chutih rualin vawk vulh lam buaipuitu AH&Vety an awm bawk a. Khawpui enkawltu, ‘khawpui sawrkar’ AMC hian vawkvulh kaihhruaina a siam dawn hian, a kaihhnawih department UD&PA leh AH&Vety lam nena hmalak tlan dan zawngin, ‘khawpui miretheite eizawnna pakhat vawkvulh hian khawpui a ti tawpin hriselna a khawih pawi thei a, engtinnge hma kan lakho theih ang’ tiin inrawnna te neiin hma lak theih ni ta se, rah tha zawk a chhuah a rinawm.
Taksa chak leh hrisel tha nei tur chuan taksa peng hrang hrangte an thawhho that a pawimawh ang tho hian, sawrkar chak leh tha a awm theih nan sawrkar hnuaia peng/department hrang hrangten thawhhona tha tak an neih a pawimawh a. Taksa peng hrang hrangah hian inkungkaih deuh bik an awm ang bawk hian, sawrkar hnuaia peng/department hrang hrang zingah pawh hian inkungkaih deuh bik, thawkho tur deuh bik hi an awm hrang leh thliah thliah a, chu chu a hna chanpual bituk dan azira awm thin a ni.
Entir nan: PWD, PHED leh P&E Dept te hi khawpui chhung inrelbawlnaah hian mahni seh seh mual hranah ti ngawt thei an ni lo. PWD-in kawngpui mam leh tlo tak siam tumin uluk takin hna a thawk a. A hnu lawkah kawngpui laihchhiat ngaiin PHE lamin tui pipe an rawn phum ve leh a. Tui pipe phumna chul mam a nih hnu lawkah P&E lamin electric ban an rawn phun ve leh a. Thawkho thiam se, sum tam tak ral tur a hum theih ang a, tha leh zung, hun pawh senral tlem a ni bawk ang a, chu chuan hmasawnna a keng dawn a ni.
Ranchaw siam nan satate dang atangin Vaimim kan chawlut tlut tlut a. AH&Vety leh Horti/Agri te hi thawkho thiam se, riral tur tam tak hi kan hum thei ang a, chu chuan hmasawnna lian zawk a keng ngei ang. Chutiang zelin dept hrang hrangte pawhin hma la tlang zel thei se.