Inremna bawhchhiaa puhin Israel-in Palestian haw tur dang

Inremna bawhchhiaa puhin Israel-in Palestian haw tur dang
Palestinian baihvai sang tel, Gaza hmar lama haw tumte chu Israel-ten Hamas-in inkahhai inremna na bawhchhia nia an sawi avangin dan mek a ni.
Inrinni khan Hamas hian Israeli sipai pali, October 7, 2023-a an ram an rûn tuma an man chu an chhuah a, Israel-in Palestinian mi tang 200 an chhuah ve bawk.
Hetih lai hian Israeli civil mi, Arbel Yehud-i chu chhuah ve a ni lo va, Hamas hian sipai ni lo chhuah tur an la nei nual.
Hamas huan Yehud-i hi a la dam a, karlehah chhuah a ni dawn tih an sawi a. Israel chuan inremna bawhchhia nia sawi hi Gaza atanga an sipaite hnuh kira Palestinian tlanchhe mekte hmar lama an haw theihna tur kawng hawnna tur chu an tihkhawtlai phah nghal a ni.
Inrinni tlai khan mi tang an inthleng fel hnua kea hmar lam pan tum Palestinian tam tak an awm a; mahse, an kawng zawh tur hi Israeli tank-ten an lo la dan avangin inhnial buai deuhna pawh a awm a ni.
Gaza lailia al-Rashid kawngpuia haw tum an pun khawmnaah hian sipai puak ri pawh hriat tur a awm nia sawi a ni.
Reuters news agency chuan mi pakhat thiin mi dang hliam pawh an awm niin Hamas enkawl health ministry leh Palestinian chanchinbute chhuah a tar lang.
Online-a hmun danga mi thil thleng tar lanah pawh silai puak vawi li hriat tur a awm bawk.
Israel Defense Forces (IDF) pawhin Gaza lailia an sipaite chuan ‘mipuite zingah kan sipaite tana hlauhawma che eng eng awm zat an awm avangin’ silai an hmet puak tih an puang bawk.
“Tun darkar reilo te chhunga silai puakte hi awm hla tura tihna mai a ni a, mi tihnat tumna a ni lo. Kan hriat theih chinah inhliam pawh an awm lo,” an ti.
Thla 15 an indo tawh hnua Hamas leh Israel ten inkahhai inremna an siamah hian Palestinian-te hi Israel-in a thunun, km sarihaa thui Netzarim Corridor zawhin Gaza hmar lama haw phalsak an ni.
Inremna a awm theih nana inbiakna neihpuitu, Qatari leh Egyptian palaite pawhin Israel leh Hamas inremna ang hian Palestinian sang tel chu hmar lama an haw hman an beisei.
Israel chuan palaite hnenah hian Hamas-in a la dam nia an sawi Yehud-i chu a dam ngei tih finfiahna an hmuh duh thu an sawi a, Inrinni tlai thleng kha fiah nan hun an pe nia sawi a ni.
Hetianga danchah an nih mek lai hian Gazan tam tak chuan kir an phal dawn em tih ngaihchangin nghakhlel takin an awm mek.