Inter-in hna hmasa hlenchhuak phawt

Inter-in hna hmasa hlenchhuak phawt
Second half laihawl pelh tawh lama striker Marko Arnautovic goal khat tihluh hmangin Thawhlehni zan Champions League last-16 first leg-ah mualneitu team-in sihnih faiin Atletico Madrid an hneh a; San Siro khelmuala goal awmchhun kha Arnautovic tan a Champions League knockout goal hmasaber a ni zui nghal.
Substitute Marko goal luhna kawnga thawhhlawk Lautaro Martinez-a shot danper a nih hnuah ball tinglet chu Arnautovic-a buaipui phakah a tla a, Austrian forward ke atanga ball chhuak hi Atletico goalkeeper Jan Oblak tan dan ngaihna a awm ta lo a ni.
Arnautovic hian second half tir lamah pawh vawi duai lo goal khung theihna hun tha hmu mah se a hlawhtling zo lo a; goal kham chunga a tauhchhuah bakah a hlapchhuak bawk.
Stoke leh West Ham forward hlui Arnautovic hian chawlhlawk hma chiaha inhliam Marcus Thuram thlakin khelmual a lut a, Serie A club damna thlentu a ni zui ta a ni.
Kum 26 mi Frenchman Thuram kha season kal laia Inter player pawimawh niin, inelna hrang hrangah goal 12 thunin, assist vawi 11 a nei tling tawh a; a ke hliam kha Inzaghi tan engtiata pawi thei nge a nih dawn a la hriat mai loh a, Inter boss chuan test kalpui a nih tur thu leh hloh rei thei an nih loh thu a sawichhuak.
Season liamta Champions League runners-up Internazionale an la chhe lo khawp mai a, Thawhlehni zanah chak phu zawkin an khel a, goal thun theihna hun remchang pawh an siamchhuak tam zawk a; Martinez-a goal tur ngawt pawh tum hnih ngawt a dinna hmun tur dik taka lo ding Oblak chuan a lu hmangin a lo dang!
Khup hliam atanga dam chho leh ta Alvaro Morata pawh San Siro inkhelah khan second-half substitute niin a inkhel lai hmuh tur a awm ve leh ta a, mahse, manager ni chunga Argentine Diego Simeone-a Champions League match 100-naah team tana danglamna thlen khawpin a la khel chhuak zo ta rih lo.
Inter goalkeeper Yann Sommer kha a hahdam deng deng hle a, vawikhat mah ‘save’ neih ngai zawngin a khawsa lo a, season kal lai inelna hrang hrangah match 21 chhung zet goal a chhuah lo tling ta a ni.
Simone Inzaghi team Inter kha Serie A lamah pawh an chungnung kal mek a, tun dinhmunah point kua zetin anmahni hnaihbertu team lakah hma an hruai fal mek a, nikum December ni 20 Coppa Italia match-a Bologna an hneh loh kha inelna hrang hranga an tlawm hnuhnunber a la ni ta rih.
March ni 13 khian Madrid khuaa Civitas Metropolitano khelmualah mualneitu team chan changin Atletico-in Italian team hi an mikhual ve thung ang.