Interim leader atan Mohammed Yunus

Nobel laureate Muhammad Yunus, Bangladesh prime minister bang ta Sheikh Hasina huat em em chu Bangladesh interim leader a ni dawn ta.
Kum 84-a upa Yunus chu Hasina-in Bangladesh a chhuahsan hnua interim sorkar kaihruaia chief adviser atana ruat a ni.
Prof Yunus chu a microloan kalpui avanga ngaihsan a hlawh em em laiin Hasina thung chuan mipui hmelma angah ngai thungin tun hnai lawkah pawh Bangladesh court chuan lung in tang turin thiamloh a chantir a ni.
Zirlai pawl Hasina paihthlak a nih nana beitute ber chuan military kaihhruai sorkar lailawk an pawm dawn loh thu sawiin chuvang chuan interim administration kaihruai turin Prof Yunus chu an thlang a ni.
President Mohammed Shahabuddin, military leaders leh students leader tena meeting an neihnaah Prof Yunus chu lungrual takin chief adviser atana an thlang a.
“Zirlai mahni inphata nasa taka tuar tawh ten hun harsa laia penchhuak tura min ngen chuan hnial thei ka ni lo” tiin Prof Yunus chuan a sawi a. Paris khawpuia awm mek niin Dhaka a pan zui nghal a ni.
Kum 1983 khan Prof Yunus chuan grameen bank, mirethei tena sumdawnna bul an tan theih nan loan tlem te te pein bul a tan a. A concept chu a that em avangin khawvel hmun tin deuhthawah ram hrang hrangte pawhin an kalpui zui ve zel a ni.
Kum 2006 khan Prof Yunus chuan Nobel Peace Prize a dawn phah bawk a, khawvel chuan ‘banker to the poor’ tiin an hria a, mahse, Sheikh Hasina thung chuan ‘miretheite thisen dawttu’ tia sawiin grameen Bank chu interest sang tak laah a puh ve thung.