International cricket chawlhsan Wagner

International cricket chawlhsan Wagner
New Zealand paceman Neil Wagner chuan nimin khan international cricket a chawlhsan thu puangin, Wellington khawpuia Basin Reserve hmuna he thu a puanchhuah laiin kum 37 mi hian a mittui a dang zo lo.
South Africa rama piang Wagner hian a career-ah Test vawi 64 khel tlingin, New Zealand bowler zinga wicket la hnem pangana niin, wicket 260 a la tling a, mahse, a kumte a lo tam ve ta a, kan hma lawka Australia nen series an khelh turah head coach Gary Stead chuan a thlang tel ve ta lo a, ram tana inkhelh a bansan thu a puang zui ve ta a ni.
Fan ngainat hlawh left-arm swing bowler chuan hun rei tak a lo vawn tawh thlah a ngai ta chu harsa a tih thu sawi chungin hnah hlui chu a til thin tih a sawi a, thangthar zawkte tana hun pek a tul thu leh an ram team chuan hmalam a pan zel a ngaih thu a sawi.
Wagner hian kum 2012 khan West Indies lakah a Test debut a nghakchhuak a, a chawlh laia a bowling average chu 27.57 runs niin, a strike rate chu 52 a ni.
South Africa ram khawpui lian Pretoria-ah piangin, Test vawihnihah South Africa tan 12th man a lo ni ve tawh a; kum 2008 khan New Zealand-ah piangin, a ram tharah chuan 12th man mai mai ni tawh loin Black Cap rinrawl a ni chho ta a, New Zealand-in world number one ranking a hauhna kawngah a thawhhlawk a, kum 2021-a World Test Championship hmasaberah pawh khan an ram chu title a lakpui nghe nghe.