International Day of Yoga hmang
International Day of Yoga hmang
Khawvel hmun dang rualin Inrinni khan Mizoramah International Day of Yoga 2025 hman a ni a. Kumin thupui chu ‘Yoga for One Earth, One Health’ tiha ni.
Aizawlah chuan National AYUSH Mission Directorate of AYUSH bultumin larsap General Vijay Kumar Singh (Retd) leh hoin hman a ni a, mi 700 vel an tel.
Larsap chuan India ram atanga bul tan leh chawilar, yoga-in khawvel pum a dengchhuak leh ngainatu an pung zel chu lawmawm a tih thu a sawi a. Yoga chu taksa, rilru leh ngaihtuahna tha taka thlunzawma hriselna tha thlentu a ni, tiin, yoga exercise hrang hrang chuan taksa leh rilru hriselna atan tinzawn leh hnathawh dan bik an nei hrang theuh tih a sawi a ni.
Yoga chuan awmze nei taka taksa sawizawi, boruak tha hip luh leh ngaihtuahna sawrbing a huam tih a sawi a. Dan dik taka yoga tih chuan hriselna a thlen rualin, tih dan dik tawk lo erawhin nghawng tha lo a thlen thei tih sawiin, yoga ngainatute chu AYUSH hotute leh mithiamte atanga inzir hmasa thin turin a chah.
India rama International Day of Yoga lawmna pui ber, Vishakapatnam Andra Pradesh-a Prime minister thusawi ngaihthlak thlirho a ni a. Hemi hnu hian common yoga protocol hmangin kalkhawm ten yoga instructor-te kaihhruaiin yoga exercise an la a ni.
Sawrkar laipui Ministry of AYUSH chuan International Day of Yoga 2025 hman dan tur signature event 10 duangin, Mizoramah chuan heng zinga pahnih – Yoga Sangam leh Harit Yoga kalpui a ni a. Yoga Sangam hian a ruala a tam thei ang ber yoga neih a entir a; Harit Yoga hian he ni denchhena thing leh mau leh luidung humhalha tihfai a entir a ni. He ni pual hian Mizoram hmun hrang hrangah thing phun niin, Directorate of AYUSH chuan a duh apiang tan ramhmul damdawi tiak a sem chhuak a ni.
Kumin thupuia thlan ‘Yoga for One Earth, One Health’ tih hian yoga exercise thatna lam ringawt thlurbing loin, environment humhalh lam ngaihpawimawh tel a kawk a. Mimal hriselna piahlamah kan chhehvela thilnung leh sik leh sa nen inkungkaihna tha leh hriselna vawnnun a tum a ni.
International Day of Yoga pual hian Mizoram district hrang hrang, District Hospital, Health and Wellness Centre, zirna in, pawl hrang hrang leh department-ten mahni hmunhma remchangah hun an hmang bawk.