Inthlan atan kohhran thalai leh tlawmngai pawl te rawn

State Media Cell for Lok Sabha General Election 2024 chuan Nilaini khan Lok Sabha inthlanpui neih tura vote tla a tam theihna atan inrawnkhawm a buatsaih a. Kohhran hrang hrang thalai hruaitute, tlawmngai pawl hruaitute leh zirlai pawl aiawhte an tel.
State Media Cell chairman, addl. chief electoral officer Dr H. Lianzela chuan MP inthlan aiin MLA inthlanah vote tla a tam sang fal hle thin tih sawiin, MLA inthlanah India rama vote thlak tha ber zinga mi kan nih laiin, a hnu thla 4 vel lekah Lok Sabha MP kan thlang leh thin a, hetah thung chuan national average pawh kan pha thei ngai meuh lo a, mipui, a bikin thalaite zingah vote tla a that leh zual theihnan kan zavaia kan tan tlan a tul a, hemi tur hian engti angin nge hma kan lak ho ang tih sawiho ruahman a ni tih a sawi.
Resource person pahnih – deputy CEO Henry C Lalrawnkima leh addl SP (Crime) Zonun Sanga ten powerpoint presentation hmangin inthlanpui neih tawha Mizoram dinhmun leh dan leh hrai zawm tur pawimawh an sawifiah a, sawiho zui niin, rawtna leh ngaihdan sawi a ni a, hemi atang hian hmalakna thar duan tum a ni.
Sawihonaah hian Mizoram Upa Pawl, Central YMA, Central KTP, Mizoram Thalai Kristian Pawl, Salvation Army Youth, North East PYD, Mizoram PYD, Adventist Youth Ministries, Diocese Catholic Thalai Pawl, Mizo Zirlai Pawl, Siamsinpawlpi (Paite zirlai pawl), Hmar Students Association, Mizoram Bawm Students Association, Lai Students Association, Mara Students Organisation, Pang Zirlai Pawl, Central Young Chakma Association leh Bru Students Association aiawhte an tel a ni.