Inthlan puan hma chuan house to house phalsak

Mizorama MLA inthlanpui neih hun tur puan hma chuan political party-te tan ina luta campaign – house to house campaign chu remtih a ni.
Mizoram People Forum Governing Board leh political party aiawhte hian Inrinni khan inthlan thawhhona thuthlung an sawiho a. Model code of conduct puan hmaa house to house campaign phal nise an ti.
Thutkhawmah hian thawhhona thuthlung siam a nih dan leh a hman tan hun tura duan te inhrilh nawn a ni a.
MPF hruaitute chuan thawhhona thuthlunga dah tam zawk hi political party lam nena sawiho hnua siam niin, MPF-in a pawng a taka a hman ngawt a ni lo tih an sawi nawn a. Thawhhona thuthlung kenkawh kawngah MPF lam chauh tih tura dah loin party lam pawhin mawha an lak tel a ngai tih sawi a ni bawk.
Thawhhona thuthlunga inziakte hi 2023 February 28-a MPF leh party lamin an pawm tlan a ni a. A hman tan hun chu thuthlung pawm tlan ni atanga ngaih tur niin, hetah hian house to house campaign hi tih loh nise, tia dah a ni.
Hetihlai hian tun tum thutkhawmah hian house to house campaign chungchang hi thlir ho that leh niin, inthlan puan hun, model code of conduct hman tan hma chu phal nise, inthlan puan a nih atangin tih tawh loh nise, tia rel a ni.
Thawhhona thuthlunga thu dah dang erawh hman mek a nih anga hman zui zel tura pawm tlan a ni.
Thutkhawm hi MPF president Rev Dr C Chawnghmingliana’n a kaihruai a, party atangin MNF, Congress, ZPM, PC leh BJP office bearers aiawh leh hruaitu dangte an tel a ni.