Inthlan puan ruala SEDP sem titawp hmak turin ngen

Aizawla cham mek Election Commission of India (ECI) thuneitute hnenah Mizorama MLA inthlanpui neih hun tur puan a nih rualin state sawrkarin SEDP sum a sem chu tih tawp hmak a nih theih nan hma la turin Congress party chuan a ngen.
ECI hotuten political party aiawhte an kawmnaah Mizoram Pradesh Congress Committee aiawha telte chuan MNF sawrkarin SEDP sum a sem chu inthlan puan a nih atang chuan tih tawp hmak a nih theih nana hma la tur te, inthlan kaihhnawiha sum leh therhlo sem a reh theih nan tan la tur te, kum upa leh rualbanlote tana vote thlak dan awlsam zawk ruahman tur te, Inrinni leh Pathianni-ah inthlan vote thlak hun ruat lo tur te-in an ngen a ni.
ECI-in state inthlan hmabak inbuatsaihna enpuia an tlawh chu tih thin dan ni mah se, ECI hotu lian zawng zawng mi 20 chuang an fehchhuah chu thil chhinchhiah tlak tak a ni tih MPCC thuchhuak chuan a sawi.
Rorel lai MNF party pawhin ECI hotute hnenah hian thu an thlen a. Mizoram chu Kristian state a nih angin, inthlan kaihhnawih reng reng Kristian sakhaw ni pawimawh – Inrinni leh Pathianni a buatsaih lo turin an ngen.