Inverter nei lo zirlaite hnenah solar light sem

Aizawl Municipal Corporation executive corporator B Lalawmpuii chuan a bial, Ward No. IX chhunga zirlaite mahni ina eizawng, khawsak harsat avanga inverter nei lo te hnenah solar light a sem.
Solar lighting system (SLS) hi AMC Ward No. IX huamchhunga local council-te sem turin an kutah a vaiin 170 a sem chhuak a. Zirlai harsa zawkte leh mahni ina eizawnna kalpuiten tangkai taka an hman theih nan an huamchhungah fair taka thlang chhuak a, a mamawh hnena pe turin a chah.
Hemi hlan rual hian an ward huamchhunga local council-te chu bawlhhlawh paih dan dinhmun report pe turin bialtu corporator hian a sawm a. Tuithiang, Saron, Dawrpui leh Chhinga Veng ten report pe in, harsatna a awm lo tih sawi theuh a ni. Bawlhhlawh paih danah an ward huamchhungah harsatna a awm lo chu lawmawm a tih thu B Lalawmpuii hian a sawi a. Bawlhhlawh paih chungchangah mahni veng theuhah theihtawpa tan la zel tur leh faina lamah tan la zel turin a sawm a ni.
Corporator chuan AMC atanga building permission pekten an permit anga an sak leh sak loh enpui thin turin LC-te chu a ngen a. Permit nei loa in sa an awm chuan AMC-ah a rang lama report tura chahin, “Building Regulation fel taka kalpui a nih zel theih nan local council leh AMC kan thawh ho zel a ngai a ni,” a ti.
Vawk vulh leh vawk talh chungchang pawh an Ward chhungah hmalakna tur tam tak a awm, tiin, local council member-te chu thawhhopuiah a sawm a ni.