Iran-in US chhang let nan Qatar-a an sipai thuthmun bei

Iran-in US chhang let nan Qatar-a an sipai thuthmun bei
Iran chuan Qatar-a US sipaite inkulhna, Al Udeid Air Base chu US-in an nuclear hmunte a beih chhan let nan a bei.
Thawhtanni zana a beih thu hi Iran-a Islamic Revolutionary Guard Corps (IRGC) chuan Iranian mipuite hnenah a puang.
Qatari khawpui, Doha leh hmun dangah chuan van sang a êng zuai zuai a, thil puak ri ring tak tak hriat tur a awm bawk.
IRGC-in thuchhuah an siamah chuan US-in ‘sipai chakna hmanga rawng taka’ an nuclear hmunte an beih chhan let nan ‘na tak leh thil tichhe na tak turin missile hmangin’ Operation Annunciation of Victory an thlak tih a tar lang.
IRGC hian ‘thutlukna siama chet chhuahna’ chuan White House leh an thawhpui ramte hnenah thuchah pawimawh tak hrilhin Iran chuan ‘a ram inpumkhatna, ram hran a nihna leh an ram himna tiderthawng thei chu chhan let lohvin a chhuah ngai lo’ tih a lantir thu an tar lang tel.
Iran hian Al Udeid Air Base an tum chhan ber chu ‘US Air Force command centre a nih avang leh Asia khawthlang lama American terrorist army anna lian ber’ a nih vang niin a sawi.
Tehran hian an missile chu Qatar-a mihring chen tam lohna lanah zel an kah thu a sawi bawk.
“He chet chhuahna hian kan thian leh kan unau, Qatar leh mipuite tana hlauhawm lo tura tih a ni a. Islamic Republic of Iran chuan Qatar nena inkungkaihna tha vawn him zel a duh a ni,” tiin Supreme National Security Council chuan thu a chhuah.
Al Udeid hi Middle East-a US sipai thuthmun lian ber niin 10,000 vel an awm.
Hectare 24-a zau, Doha chhimthlang thlalera an hmun hi kum 1996-a an din kha a ni a. US Central Command hnuaia headquarters hmatawng niin sipaiten heng lai ram zau tak, khawthlang lama Egypt atanga khawchhak lama Kazakhstan thleng an chet velna inghahna a ni.
He hmunah hian Qatar Emiri Air Force, US Air Force, United Kingdom Royal Air Force leh ram dang sipaite pawh an awm.
US defence thuneitu pakhat chuan, “Al Udeid Air Base hi short-range leh medium-range ballistic missile hmangin Iran atanga kah a ni,” tiin a sawi niin Reuters news agency chuan a tar lang.
Qatar-a defence ministry chuan air defence system hmangin base kah tum Iranian missile-te an lo dangchat tih a puang ve bawk a. A hmain Doha hian an rama base-te chu beih an ni dawn tih hriattirna a dawng lawk a ni.
“Zan dar 07:30 (India zan dar 10:00)-ah Iran atangin Al Udeid Air Base hawia missile pasarih kah a ni tih kan dawng,” tiin Qatari thuneituten Thawhtanni zan tlai tawh takah khan an sawi.
Al Udeid Air Base hi beih a nih hmain rauhsan hman a ni tih an sawi bawk.
An foreign ministry chuan hetiang chetna hi ‘ram hran an nihna leh UN charter-a an van sang dik lo taka hmasakna’ tiin a sawi a, Doha-in chhan let theihna dikna a nei tih a sawi bawk.
Qatari defence ministry chuan thi leh hliam an awm lo tih a sawi a. Interior ministry chuan Iran atang hian missile 19 kah chhuah a nih thu sawi zuiin pakhat chiahin Al Udeid Air Base hi a fuh a, thi an awm lo niin a puang zui bawk.
Beihna a thlen hma hian Qatar-a US leh UK embassy-te chuan an mite chu hmun himah awm turin an hriattir lawk a. A hnua beihna a tawpah hei hi hlih leh nghal a ni.
He rama British, American leh European sikulte chuan Thawhlehniah chawlh an puang zui rih tih an sawi.
Qatar-a education ministry pawhin Thawhlehnia exam awm tur zawng zawng pawh Nilainiah a sawn tih a puang.
Interior ministry chuan an ramah boruak a pangngai vek a, thuneituten vantlang himna atan hna an thawk zel tih a sawi a. Foreign ministry pawhin beihna a thlen hnuah nunphung ‘a pangngai lehnghal’ tih a sawi.
Qatar hian an van sangte chu ‘mi chengte leh tlawhtute himna atan’ an khar tih an puang a; mahse, darkar nga hnuah an hawng zui leh.