Israel-in Brazil president dem hle

Donald Trump, US president a nih laia Russian leader Vladimir Putin a fak avanga sawisel hlawh tak chuan Russian opposition leader Alexei Navalny thina chungchangah sawi nei ve tawhin mahse tumah demna lam a sawi lo.
“Alexei Navalny thi thut chuan kan rama thil thleng meka hlauhthawnna min neih tir a ni” tiin Republican presidential nominee nih tum chuan a Truth Social platform ah ziak langin Navalny thihna chu ama politics buai lamah a kailut daih a ni.
“Zawi muangin misual, Radical Lef Politician, Prosecutors leh Judges te hian chhiatna min panpui mek a ni. Ramri hawn, Election tihchingpen, dik lo taka court a htutlukna siam te chuan America a tichhe mek zel a. Ram tlachhe mek, ram hlawhchham mek kan ni” tiin a ziak a ni.
Russia a opposition lar ber Navalny ah Trump an amah nena inanna an neih hriatthiam a har a. Kum 47 a upa Navalny khan Putin a kaihhruai Russia ah eirukna nasa tak awm tiin Russia chu ‘misual leh rukru’ ten an kaihruai tiin a sawi thung.
Trump hian thubuai a neihah karkalta Zirtawp khan court chuan a net worth dik lo taka sawia bumna kalpui tiin $355 million chawi turin a tih chu politics thila amah tihchiat tumna a ti a. Hei bakah hian Trump hian criminal trial pali hmachhawn tur a la nei bawk.
President Joe Biden thung chuan karkalta Zirtawp khan Navalny thihna chu Putin vang tiin a sawi thung a. Trump a elpui ber Nikki Haley pawhin Putin chu mawhphurtuah a puh tho a. Biden chuan, ‘Navalny thihnaah Putin chu mawhphurtu a ni’ a ti.
Kremlin erawh chuan Navalny thihnaah inhnamhnawihna an nei lo tia sawiin Putin puhna chu pawmtheihloh tiin an sawi ve thung.
Karkalta Zirtawp a Navalny thih hnuah US president hlui leh Congress top member te chuan Putin an puh vek a, an demthu an sawi bawk a. Trump erawh chuan ngawih chuhin Thawhtan khan a sawi chhuak ve chauh a ni.
Kum 2017-2021 a White House a luahlai khan Trump chuan Putin a ngaihsan thu a sawi a. Kum 2018 khan Trump chuan Russian leader Putin an kum 2016 US election ah inrawlh a tum tia puhna chu a hnawl bawk a, chvang chuan sel a hlawh hle. Karkalta lawk kkhan United States chuan NATO ram te chu defense lama sum seng tam duh lo te chu Russia in a runin a chhan lovang a lo ti tawh bawk.

Nikky Haley in Trump sawisel
South Carolina governor hlui Haley chuan Trump chu sawiselin ram hmangaih lo a ti a. “Donald Trump hian tualthattu a nihnaah Vladimir Putin a dem tur a ni. Trump hian Navalny huaisenna kkha fak zawk tur a ni” tiin a sawi a. Chutiang ti lo chuan America hnawlin Russia nen a khaikhin a ni a ti bawk.
Hei mai bakah hian Haley chuan Sumter, South Carolina a campaign a neihnaah Trump a NATO comment chungchang sawiin, “Amah eltute tihlum zel dictator a tan zawk” tiin Trump chu a sawisel bawk.
US Representatives hlui Repugblican Liz Cheney, Trump supporter tena January 6, 2021 a Capitol an suasam congress panel investigation neiha vice chair chuan Trump chuan thuneihna a chang leh a nih chuan a political opponent te laka phuba lak a intiam fo tiin a sawi bawk a.
“Vladimir Putin an Navalny laka a thiltih hi phuba lakna chu niin leader ber rule of law in a phuar velohna hmuna thil thleng a ni” tiin a sawi.
Hetihlai hian Trump hian thubuai pali ngawt a la nei bawk a.
Navalnya thihna chungchang sawi chhuak mai lova a awm leh tuna a sawi lan danah pawh Russia president Vladimir Putin demna a la nei miah lo chuan US inthlanna neih tur a tingaihnawm dawn tih a ni.