Israel-in Gaza a beih thar lehnaah thi pung zel

Israel-in Gaza a beih thar lehnaah thi pung zel
Israel-in Gaza a beih chhunzawm thar leh meknaah Nilaini zan lai atanga thlawhnaa a beihnaah Palestinian 85 an thi leh tawh niin Hamas enkawl health ministry chuan a sawi.
Israel sipaite pawhin Hamas-in an kah nia an sawi, Tel Aviv chetna an chhan letna rocket pathum an kap thla tih a puang ve bawk.
Israel hian tun karah Gaza hi bomb leh lei lamah a bei thar leh mek a, ni hnih liam ta chhungin thlawhna atanga a kahnaah mi 500 chuang an thi niin health ministry chuan a sawi.
Israel Defense Forces (IDF) chuan Ningani khan Gaza hmar lam chu lei sipaite nen an bei leh tan tih a puang a. Tun hi January thla tawpa inkahhai an puan hnua lian thama an chet lehna hmasa ber a ni.
Gaza-a health ministry chuan Ningania beihna an tawhah mi 133-in hliam an tuar bawk niin a puang.
Israel hian inkahhai pawt sei tura indawrna a hlawhchham hnuah Thawhlehni atang khan an bei chhunzawm leh a, Hamas-in an mi hrente an chhuah hma chu an bei zui dawn tih a puang bawk.
Israel hian Hamas-in mi 59 an la hreng nia sawiin an zinga 24 hi an la dam niin an hre bawk.
IDF thupuangtu, Col Avichay Adraee chuan Hamas-in Gaza chhim lam atangin rocket pathum an kap tih a sawi a. Pakhat kap thlain pahnih dang chu ‘hmun awl laiah’ a tla niin X-ah a tar lang.
Col Adraee-a hian an sipaite chu strip laili, Netzarim Corridor an tih, Gaza chhim leh hmar inrina laiah an awm tih a sawi.
Gaza-a health ministry chuan Thawhlehni atanga Israel-in a beih leh chinah mi 591 vel thiin naupang 200 chuang an tel tih a puang.
Israeli sorkar thupuangtu, David Mencer-a chuan tharum thawh thar lehah hian Hamas chu a mawhphurtuah puhin ‘hetiang thleng tur hian min nawr lui a, mi hren chhuah an duh lo va, US leh mi dangte dawrna pawh an pawm lo’ niin a sawi.
Hetih lai hian UN chuan Palestinian raltlante buaipuitu, Unrwa-a thawk an mi panga an thi tel niin an agency chief Philippe Lazzarini chuan X-ah a tar lang a. “Zirtirtu, doctor leh nurse an ni,” a ti.
Gaza-a health ministry chuan Israeli tihah a puh a, Israel sipaite chuan hetiang an tih loh thu leh an chhui nghal thu a sawi thung.
Jerusalem leh Tel Aviv-ah chuan Israeli tam takin Netanyahu-a duh lohna an lantir mek bawk a, Hamas mi hrente la kir turin an phut.
Mi eng emaw zat man an ni a, Jerusalem-ah chuan police-in tuiin an phuh darh hlawm.
Hetih lai hian Yemen-a Houthi helte chuan Ningani khan ballistic missile-in Israel a kap a, Iran-in a puih pawl sipai thupuangtu chuan Tel Aviv bula Ben Gurion Airport kah an tum thu a sawi.
IDF chuan eng pawi mah a khawih loh thu leh Israel a luh hmain missile hi an kah thlak thu an sawi.
Israel Prime Minister Benjamin Netanyahu-a chuan Thawhlehni khan ‘thapuiin’ an chet leh thu leh inkahhai puanna tura inbiakna chu ‘a derthawng hle’ tih a sawi.
Mi hren chhungte chuan Israeli sorkar hi mi hrente laka beidawngah an puh a. Israel leh Hamas hi inkahhai thawh khatna, March 1-a a tawp hnua kal zel dan turah an inrem thei lo zel a ni.
Israel leh Hamas inbeihna hi October 7, 2023-a Hamas-in Israel beia mi 1,200 chuang a thah leh hren tura mi 251 a hruai atanga intan a ni a. Israel hian bei lehin Palestinians 48,500 chuang an thi tawh a, chenna in a chhe deuh vek tawh bawk.