Israel-in Gaza a beihnaah UN hnathawk thi

Israel-in Gaza a beihnaah UN hnathawk thi
UN chuan Nilainia compound tihchhiatah an hnathawk a thi tih an puang a, thil thlen dan kimchang erawh a la chiang lo.
Palestinian ram chhunga Hamas enkawl health ministry chuan Israeli beihna vang nia sawiin ram dang hna thawk hliam tuar panga chu damdawi inah dah an nih thu a sawi a. Israel sipaite erawh chuan Deir al-Balah-a UN compound an bei lo tih an sawi thung.
Thla hnih inkahhai puan a nih hnuah Israel chuan Gaza a bei chhunzawm leh mek a, Gaza-a health ministry chuan mi 400 chuang an thi leh tawh tih a sawi.
Thawhlehni khan Israel Prime Minister Benjamin Netanyahu-a chuan ‘thapui an chhuah leh dawn’ tih a sawi bawk.
A tukah Israel Defense Forces (IDF) hian Gaza-ah hian lei lamah beihpui lian zawk thlak nghalin Gaza chhim leh hmar thentu, Netzarim corridor an thleng.
Sipaite hian ‘chhim leh hmar inkarah buffer zone an siam’ tih sipaite chuan an sawi.
UN chuan an hnathawk pahnih an thi niin an sawi phawt a, a hnuah pakhat zawk chu an hnathawk a ni lo tih an sawi leh.
UN Office for Project Services (UNOPS) chuan building hi ‘puak thei hmanga thlak emaw, kah emaw a ni’ an ti a, ‘hmun fal taka awm’ niin an sawi bawk.
Eng anga beih nge an nih leh eng ralthuam hmanga bei nge an nih erawh an la sawi lo.
UNOPS Executive Director Jorge Moreira da Silva chuan thil thleng hi ‘tihpalh a ni lo’ tih a sawi a, ‘UN mite leh an hmun hi tute pawhin an venghim tur a ni’ tiin a sawi bawk.
UN Secretary General António Guterres cuan an guesthouse pahnih beih niin chhui mek a ni tih a sawi.
Video darhah chuan UN flak jacket pawl la ha pahnih chu ambulance leh UN car hmangin damdawi inah phurh thlen a ni tih a lang.
Israel-in Palestinian ram a beih chhunzawm lehnaah Thawhlehni zan khan thlawhna atanga Gaza kahnaah mi 20 vel an thi bawk.
Palestinian Wafa news agency chuan Red Crescent sawi chhuah chhawngin Israeli drone-in al-Mawasi humanitarian zone bula puan in a fuhah civil mi pahnih thiin mi dang panga an hliam bawk tih a tar lang.
Israeli sipaite chuan Israel beih tuma inpuahchah leh mek Hamas sipai hmunte chauh an kap tih an sawi a. Hamas thunun lawngte an bei bawk tih an sawi.
Gaza-a health ministry chuan Thawhlehni atang khan mi 436 an thi tawh a, an zinga 183 chu naupang an ni tih a sawi.
Thawhlehnia Gaza kah hi January 19 atanga inkahhai an puan hnua Israel-in a kah leh nasat ber ni a ni.