Israel-in Gaza-a cafe a kahnaah mi 20 vel thi

Israel-in Gaza-a cafe a kahnaah mi 20 vel thi
Israeli thlawhnain Gaza khawthlang lama tuipui kama thingpui dawr lun tak, activist, chanchinbumi leh tual chhung mite luh tamna a kahnaah mi 20 vel an thi niin damdawi ina thawk leh a hmututen an sawi.
Rescue team chuan Al-Baqa Cafeteria-ah hian ruang 20 an hmu tawh a, tam tak hliam an awm bawk tih Gaza-a Hamas enkawl Civil Defence thupuangtuin BBC an hrilh a. He hmun hi tuipui kama puan in kaiha awm a ni tih a sawi.
Thawhtannia kahnaah hian lei thuk takin a khuar a, mi an la awm em tih zawn mek zel a ni bawk.
“Café-a internet hmang tura ka kal laiin hla lo tê a ni tawh tihah thil puak na tak a awm a ni,” tiin tual chhung production company-a cameraman Aziz Al-Afifi chuan a sawi.
Activist-ten social media-a video an tar lanah missile-in a fuh lai a lang a, Israeli indo thlawhna atanga kah ngei niin a lang a. A hnu lamah chuan chhuata ruang let rem rum a lang bawk.
Al-Baqa Cafeteria hi chanchinbumi, activist leh mi dangte pawhin internet an pek theih avangin an pan nasa a, thutna tha awmin Gaza-a Mediterranean tuipui kama hna thawh pah theihna hmun lar tak a ni.
Israeli sipaite chuan he thil thlengah hian engmah thu an la nei lo.
Pathianni zan zankhua khan Israel hian thlawhnain Gaza Strip hmun tam tak an kap bawk a, Palestinian chhungkaw tam tak tlanchhiat ngaiin an awm phah niin hmututen an sawi.
Rescue team-te chuan ruang panga an hmu tawh a, hliam tuar mi eng emaw zat Gaza City-a Al-Ahli Hospital-ah an dah lut bawk.
Nasa taka Gaza an beih lai hian Israeli Prime Minister Benjamin Netanyahu-a chu inkahhai inremna pawm tura nasa taka nawr mek zel a ni.
Inrinni khan US President Donald Trump-a chuan social media-ah Netanyahu-a hi Hamnas nena ‘tunah’ inremna siam tura hna thawk nghal turin a ti a. A hma ni chiah khan Hamas hotu pakhatin palaiten inkahhai thar siam turin thil an buaipui mek a; mahse, Israel lamah harsatna a la awm tih a sawi bawk.
Israeli sipaite hian October 7, 2023-a Gaza-a Hamas-ten an ram beia mi 1,200 chuang an thah leh hren tura mi 251 an hruai phuba lak nan an bei let a. Tun thlengin mi 56,000 chuang thi an awm tawh niin Hamas enkawl health ministry chuan a sawi.