Israel-in Gaza pumah zau zawkin beihpui thlak tan

Israel-in Gaza pumah zau zawkin beihpui thlak tan
Israel-a sipaite chuan Gaza pumah ‘lei lama beihpui zau tak’ a thlak tan a, Pathianni zan khan hmun tam takah inthiar chhuak tura thupek a tichhuak.
Israeli Defense Forces (IDF) chuan Pathianni khan Operation Gideon’s Chariot tih hming vuahin Gaza hmar lama hmun hrang hrang beiin damdawi inte pawh a tel.
Israel chuan Gaza-a hren mekte chhuah zalen ngei leh Hamas hneh a tum.
Chhim lama Khan Younis leh hmar lama Beit Lahia leh Jabalia refugee camp pawh an bei niin chhanchhuah hna thawktuten an sawi.
Hamas hnuaia health ministry chuan darkar 24 liam ta chhungin Gaza-ah mi 67 an thi a, mi 361-in hliam an tuar bawk niin an sawi.
Gaza-a emergency service lian ber, civil defence chuan chhim lama al-Mawasi camp, baihvaiten awm nana an hman pawh Inrinni zan khan beiin mi 22 an thi a, mi 100 vel an thi a. Camp hi a hmain ‘safe zone’ tia sawi a ni.
Pathiannia insaseng tura tihna thupek hi Israeli sipaite chuan ‘final warning’ tiin an sawi a, ‘rocket kah chhuahna atana hman hmunte chu na takin beih a ni dawn’ tia sawiin mipuite chu ‘rang takin khawthlang lama al-Mawasi-ah insaseng turin’ an ti a ni.
North Gaza-ah chuan damdawi in pathumte chu ‘hna thawk thei lo’ tiin ministry chuan a sawi.
Israeli sipaiten na zawka beihpui an thlak hi ‘indonaa an tum tihhlawhtlin vek nan’ an ti tih an sawi a, heng zingah hian mi hren chhuah vek leh ‘Hamas hneh’ pawh a tel tih a sawi.
Hetih lai hian mi hren mek chhungte chuan beihpui thlakna hi Gaza-a hren mekte tan ‘thlanmual leh hlauhawm a ni thei’ niin an sawi ve thung.
“Chhuah tawhte sawi danin hetianga sipaite an chet hian an enkawlna a khirh sawt zel a, sawisak, ei leh in pek tlem thlengin tih thin a ni,” tiin Hostages & Missing Families Forum chuan an sawi.
Israel leh Gaza-a Hamas indona hi Hamas-in October 7, 2023-a Israel chhim lam beia mi 1,200 chuang an thah leh hren tura mi 251 an hruai atanga intan a ni a, Israel hian phuba lak nan a bei zui ta chiam a ni.
Gaza-ah hian mi hren 58 an la awm mek a, an zinga 23 chu an la dam nia hriat a ni.
Indona a chhuah atang hian Palestinian 53,000 chuang thi an awm tawh niin Gaza-a health ministry chuan a sawi.